Memleket basshysy Qasym-Jomart Toqaev Qazaqstan halqyna Joldaýynda aýdan ákimderine jergilikti bıýdjetti basqarý quqyǵy beriletinin aıtty, dep habarlaıdy Egemen.kz.
«Aýdan ákimderine jergilikti bıýdjetti basqarý quqyǵyn bergen jón dep sanaımyn. Bul, eń aldymen, sol jerdegi máselelerdi jedel sheshý úshin qajet. Budan bólek, jergilikti bıýdjetke jınalatyn salyqqa qatysty jeńildikterdi anyqtaý quqyǵyn aımaqtardyń ózine berý máselesin qarastyrý kerek. Bul shara bıznestiń damýyna úlken serpilis ákelmek. Usynylyp otyrǵan bastama óte mańyzdy. Keleshekte aımaqtardyń tabysty damýyna aıryqsha yqpal etedi.
Sol sebepti barlyq ákim bıýdjetaralyq qatynastardyń jańa úlgisine kóshý kezinde onyń birtutas memleketimizge tıgizetin paıdasy jáne tıimdiligi týraly oılaýy kerek», dedi Memleket basshysy.