Kúni keshe ǵana Pragada ótken ITF W60 týrnırinde top jarǵan qazaq tennısshisi Jibek Qulambaeva kóp keshikpeı Apennın túbeginde shymyldyǵy túrilgen týrnırge qatysty.
Biraq Italııanyń Barı qalasynda onyń joly bolmady. Irikteý synynan irkilmeı ótken Qulambaeva alǵashqy aınalymda Reseıdiń ataqty tennısshisi, Bıllı Djın Kıng týrnıriniń jeńimpazy, kezinde álemdik reıtıngte TOP-10-dyqta bolǵan Veronıka Kýdermetovanyń týǵan sińlisi Polınaǵa 1:6, 5:7 esebimen ese jiberdi. Esesine Qazaqstannyń taǵy bir tanymal oıynshysy Denıs Evseev Ystanbulda jalaýy jelbiregen jarystyń alǵashqy aınalymynda slovakııalyq Norbert Gomboshqa san soqtyrdy – 6:4, 6:1, 6:2. Sol sekildi Tımofeı Skatov ta Sevılıadaǵy týrnırdiń ekinshi kezeńine shyqty. Pıreneı túbeginde ol polshalyq Danıel Mıhalskıden aılasyn asyrdy – 6:1, 5:7, 6:3.
Al Nıý-Iorktegi US Open týrnıriniń shırek fınalynda Anna Danılına men fınlıandııalyq Harrı Helıovaara juby qytaılyq Ifan Sıýı men belgııalyq Ioran Flıgennen 7:5, 7:6 esebimen basym tústi. Osylaısha, olar jartylaı fınalda kúsh synasý múmkindigine ıe boldy.