Qazir qoǵamda jeńil aqshaǵa elirip, «lýdomanııa» dertine shaldyqqandardyń qatary kóbeıdi. Statıstıkany baǵdarlasaq, byltyr elimizde qumar oıyndardy uıymdastyrý jáne bás tigý boıynsha qyzmetter kólemi 553,6 mlrd teńgeni quraǵan. Osy oraıda Prezıdent janyndaǵy jastar saıasaty jónindegi keńes músheleri lýdomanııanyń aldyn alý jónindegi jumysty jetildirý máselelerin talqylady.
Keńes músheleri «Lýdomanııanyń aldyn alý jónindegi keshendi jospardy» ázirleý men iske asyrýdyń ýaqtylyǵy men qajettiligin, sondaı-aq 4 qyrkúıekte Qaýipsizdik keńesiniń otyrysynda aıtylǵan Memleket basshysynyń tapsyrmalaryn iske asyrýdyń mańyzdylyǵyn atap ótti. Onyń barysynda halyq arasynda, ásirese jastar arasynda tárbıe jáne túsindirý sharalary bóliginde oıynǵa táýeldilik máseleleri qaraldy.
Jıyn barysynda Týrızm jáne sport vıse-mınıstri Erjan Erkinbaev Qazaqstan Prezıdenti janyndaǵy jastar saıasaty jónindegi keńes múshelerine «Oıyn bıznesi jáne lotereıa qyzmeti salasyndaǵy memlekettik retteýdi jetildirý, lýdomanııanyń aldyn alý jónindegi keshendi jospardyń» jobasyn tanystyrdy.
Talqylaý qorytyndysy boıynsha keńes músheleri «Lýdomanııanyń aldyn alý máseleleri jónindegi keshendi jospardyń» jobasyna birqatar sharalardy engizý, ásirese jastar arasynda oıynǵa táýeldilikpen kúres jónindegi aqparattyq-ıdeologııalyq sharalardy kúsheıtý, sonymen qatar eldegi lýdomanııanyń damýyna jol bermeýge yqpal etetin áleýmettik kózqarastardy qalyptastyrýǵa azamattyq qoǵam, dinı qyzmetkerler men buqaralyq aqparat quraldarynyń ókilderin tartý boıynsha birqatar usynys engizdi.
Budan bólek, keshendi jospardy iske asyrýdyń sapasy men tıimdiligin arttyrý maqsatynda árbir baǵyt boıynsha keńes músheleri, qoǵamdyq pikir kóshbasshylary, blogerler men sarapshylar kiretin salalyq jumys toptaryn qurý jóninde sheshim qabyldandy.