Bıyl ekinshi ret uıymdastyrylyp otyrǵan «Uly dala joryǵy» respýblıkalyq marafon-báıgesine el óńirlerinen 19 komanda qatysyp jatyr. At jarysy elordanyń irgesindegi Qarajar aýylynan bastaý aldy, dep jazady Egemen.kz elorda ákimdiginiń baspasóz qyzmetine silteme jasap.
Shabandozdar 1 300 shaqyrym qashyqtyqta jarysatyn marafon-báıge 19 qyrkúıek kúni Túrki áleminiń rýhanı astanasy – Túrkistan qalasynda máresine jetedi.
Joryq qatysýshylaryn shyǵaryp salý is-sharasyna marafon-báıgege uıytqy bolǵan ulttyq sporttyń janashyr azamattary – «AMANAT» partııasynyń Atqarýshy hatshysy Dáýlet Káribek, QR Týrızm jáne sport mınıstrligine qarasty Sport jáne dene shynyqtyrý isteri komıteti tóraǵasynyń orynbasary Bekbolat Baıjanov, QR Ulttyq sport qaýymdastyǵynyń prezıdenti Islambek Saljanov, «JORYQ» at sporty federasııasy Qamqorshylyq keńesiniń tóraǵasy Álibek Áldeneı qatysty.
«Keshe ǵana Ulttyq sport túrleri boıynsha VI festıvaldyń resmı ashylýyn ótkizdik. Al búgin barshamyz ekinshi ret uıymdastyrylyp otyrǵan «Uly dala joryǵynyń» bastalý saltanatyna jınalyp turmyz. Ulttyq sport qaýymdastyǵy 2 jyl qatarynan seriktes bolyp, «Uly dala joryǵy» jobasyn qoldap otyr. Ulttyq sportymyz ata-babalarymyzdan bizge qalǵan asyl murasy jáne amanaty. Ulttyq sporttyń artynda ultymyzdyń rýhy men namysy, tarıhy men salt-dástúri tur.
Ulttyq sportymyz – elimizdi biriktiretin negizgi faktorlardyń biri.
Memleket basshysy Qasym-Jomart Kemeluly Toqaev ulttyq sporttyń damýy men nasıhattalýyna erekshe nazar aýdaryp otyr. «Uly dala joryǵy» álemde joq respýblıkalyq marafon-báıge. Búgin osy báıgege elimizdiń barlyq aımaǵynan 100-den astam shabandoz qatysyp jatyr. Olar 14 kúnde 1300 shaqyrym jerdi shaýyp ótedi. Astanadan bastalǵan báıge Túrkistanda máresine jetedi. Men barlyq shabandozǵa sáttilik tileımin!», dedi Islambek Saljanov.
Aıta ketsek, báıgeniń jalpy júlde qory – 65 mln teńge. Jeńimpaz komandaǵa 30 mln teńge, 2-orynǵa 20 mln teńge, al 3-orynǵa 15 mln teńge tabystalady.
О́z kezeginde «JORYQ» at sporty federasııasy Qamqorshylyq keńesiniń tóraǵasy Álibek Áldeneı joryqtyń bul joly da joǵary deńgeıde ótetinine senimdi ekenin jetkizdi.
«Táýelsizdikke qol jetkizip, egemendi el bolǵaly Qazaqstanda ulttyq sport túrleri joǵary qarqynmen damyp keledi. Ulttyq sporttyń artynda ulttyq qundylyq tur. Joryq bizdiń elimizdiń salt-dástúrin nasıhattap, ótkeni men búginin jalǵaıtyn tamasha joba. Marafon-báıgege qatysyp otyrǵan barlyq shabandozǵa sáttilik tileımin! Sáttilik serik bolsyn!», dedi Qamqorshylyq keńesiniń tóraǵasy.
Marafon-báıgeniń uıymdastyrýshysy Ǵanı Dúıshenovtiń aıtýynsha, joryq barysyn 2 halyqaralyq jáne 2 qazaqstandyq sýdıa baǵalasa, al jol boıy attardyń jaǵdaıyn 2 halyqaralyq jáne 3 qazaqstandyq mal dárigeri qadaǵalaıdy.
«Joryq 14 kezeńnen turady. Birinshi kezeń – 50 shaqyrym. Odan keıin 12 kezeńde 100 shaqyrymdy júrip ótedi. Shabandozdar sońǵy 14-kezeńde taǵy 50 shaqyrym joldy baǵyndyryp, Túrkistanda márege jetedi. Joryqqa Atyraý oblysynan basqa barlyq óńirdiń komandalary qatysyp jatyr. Barlyǵy marafon-báıgege saqadaı saı. Keshe attar veterınarııalyq tekserýden ótti», dedi Ǵanı Dúıshenov.
Búgin birinshi kezeńniń úzdikteri de anyqtaldy. Birinshi kezeńniń 50 shaqyrymyn alǵash bolyp Jambyl oblysy 2 saǵat 23 mınýt, 37 sekýndta baǵyndyrdy. Ekinshi oryn Soltústik Qazaqstan oblysynyń enshisinde. Olardyń nátıjesi – 2 saǵat, 57 mınýt, 04 sekýnd. Al Jetisý oblysynyń komandasy úzdik úshtikti 2 saǵat, 58 mınýt, 32 sekýnd ýaqytpen túıindedi.