23 qyrkúıekte Qytaıdyń Hanchjoý qalasynda alaýy tutanatyn HIH jazǵy Azııa oıyndarynda Qazaqstannyń karateshileri qandaı quramda óner kórsetetini belgili boldy.
Baıraqty básekede 12 salmaq dárejesi boıynsha túrli-tústi medaldar sarapqa salynady. Sonyń segizinde jerlesterimiz óner kórsetedi. Jarys jolyna shyǵatyndardyń deni – talaı dúbirli dodada daralanǵan saqa sportshylar. Solardyń arasyndaǵy eń ataqtysy – Sofıa Berýlseva. +68 kılo salmaq dárejesinde saıysqa túsip júrgen ol – Tokıo Olımpıadasynyń qola júldegeri, Islam yntymaqtastyǵy men Dúnıe júzi oıyndarynyń jeńimpazy. 67 kılo salmaqtaǵy Dıdar Ámiráli 2018 jyly Djakartada ótken Azııa oıyndarynda kúmispen kúptelse, 84 kılo salmaqtaǵy Danııar Iýldashev dál sol dodada qolaǵa qol sozdy. Móldir Jańbyrbaı (50 kılo), Qaısar Alpysbaı (60 kılo) jáne Nurqanat Ájiqanov (75 kılo) Premer-lıga serııasynda jeńis tuǵyryna kóterildi. Olardan bólek, Ásel Qanaı (61 kılo) men Laýra Áliqul (68 kılo) tatamıge shyǵady. Olar da halyqaralyq týrnırlerde mol tájirıbe jınaǵan.
Qazirgi kezde elimizdiń ulttyq qurama komandasy Fransııada ózderiniń sońǵy oqý-jattyǵý jıynyn ótkizý ústinde.