Premer-mınıstr Álıhan Smaıylov pen Sinopec kompanııasynyń prezıdenti Iýı Baosaı munaı-gaz salasynda jańa jobalardy júzege asyrý máselelerin talqylady, dep habarlaıdy Egemen.kz Úkimettiń baspasóz qyzmetine silteme jasap.
Úkimet basshysy Sinopec kompanııasynyń tikeleı qatysýymen elimizde birqatar mańyzdy jobanyń júzege asqanyn, onyń ishinde Atyraý munaı óńdeý zaýytyn modernızasııalaýdy atap ótti.
Sondaı-aq ol Prezıdent Qasym-Jomart Toqaevtyń halyqqa Joldaýynda elimizdiń myqty ónerkásiptik negizin qalyptastyrý qajettigin atap ótkenin eske saldy. Atap aıtqanda, munaı-gaz hımııa óndirisin jedel damytý mindeti qoıyldy.
«Sol sebepti negizgi «Polıetılen» jobasy munaı-gaz hımııa ónerkásibin damytýdaǵy mańyzdy kezeń bolyp tabylady. Ony júzege asyrý el ekonomıkasyna mýltıplıkatıvti áserin tıgizbek. Sinopec kompanııasy munaı-gaz hımııa salasyndaǵy álemdik kóshbasshylardyń biri ekenin eskersek, kompanııanyń jobaǵa teń quqyly seriktes retinde kelýi strategııalyq mańyzdy másele», dedi Álıhan Smaıylov.
Sonymen qatar Sinopec kompanııasynyń elimizdegi basqa da perspektıvalyq jobalarǵa qatysý múmkindigin qarastyryp jatqany ataldy.
О́z kezeginde Sinopec kompanııasynyń basshysy Qazaqstan men Qytaı arasyndaǵy energetıka salasy boıynsha yntymaqtastyq joǵary qarqynmen damyp kele jatqanyn atap ótti. Bul, óz kezeginde, eki el halyqtarynyń ál-aýqatyn arttyrýǵa zor úles qosyp jatyr.
Budan bólek, Sinopec prezıdenti munaı-gaz salasyndaǵy qazaqstandyq mamandardyń kásibı taǵylymdamadan ótýin uıymdastyrý jóninde bastama kóterdi.