Jerlesterimiz – jartylaı fınalda

Alǵashqy kezeńde jerles­terimiz Mysyr quramasynan 3:1 esebimen basym tústi. Bul kezdesýde Bı­bi­sara Asaýbaeva men Merýert Ka­ma­ledınova jeńiske jetse, Kse­nııa Balabaeva men Alýa Nur­manova teń upaıǵa qol jetkizdi. Ekin­shi aınalymda Ún­distannyń shahmatshyla­rymen sheberlik baıqasty. «Oı­lylar oıynyn» oılap tap­qan memleket ókilderine qarsy báse­kede bu­rymdylarymyz she­ber­­lik­tiń shynaıy úlgisin kór­setti. Alǵashqy úsh kezdesý teń aıaq­taldy. Endigi úmit tór­tinshi taq­tada oınaǵan Ámına Qaıyr­bekovada edi. Qazaqtyń qarshadaı qyzy el senimin aqtady. Ol Shrı Savıtýdan aılasyn asyryp, Qazaq­stanǵa jeńis syılady – 2,5:1,5.

Fransııa quramasyna qar­sy ótken úshinshi kezeńde ko­mandanyń lıderi Asýbaeva qar­sylasymen upaı bóliskenimen, Kamaledınova men Qaıyrbekova básekelesterinen basym tústi. Al Ásel Serikbaı jeńilis tapty. Qorytyndy esep – 2,5:1,5. Odan keıin otandastarymyz dál osyndaı eseppen Ýkraınany qapy qaldyrdy. Bul joly Bıbisara men Alýa jeńis toıyn toılasa, Merýert Natalıa Býksamen teń oınady. Toptyq týrnırdiń sońǵy týrynda Qazaqstan men Grýzııa teń tústi.

Sóıtip, qatarynan tórt kezdesýde jeńiske jetip, taǵy bir básekede teń oı­naǵan otandastarymyz qory­tyndy esepte 9 upaı jınap, óz tobynda birinshi oryndy ıelendi. Ekinshi oryndy Grýzııa enshiledi. Qap taýynan kelgen qyzdardyń qorjynynda 7 upaı bar. Úshinshi jáne tórtinshi oryndardy Fra­n­sııa men Ýkraına óz­ara bó­listi – 5 upaıdan. Úndistan tórt upaıǵa qol jetkizse, Mysyrǵa soqyr upaı da buıyrmady. Ke­lesi topta AQSh pen Polsha má­rege birdeı jetti. Bul komandalar 7 upaıǵa ıelik etti. Basty qar­sylastarynan bir upaı kem jı­naǵan Qytaı úshinshi oryndy ıe­lendi. Tórt upaıy bar Germanııa tórtinshi satyǵa turaqtady.

Shırek fınalda bizdiń bu­rymdylar Germanııaǵa qarsy oınady. Nemis shahmatshylary qansha tyrysqanymen, qazaq qyzdarynyń qarqynyna shyda­mady. Bıbisara, Alýa jáne Ámına qarsylastaryn qapy qal­dyrsa, Merýert jeńilis tapty. Nátıjesinde 3:1 esebimen ba­symdyq tanytqan Qazaqstan qura­masy jartylaı fınalǵa jol­dama aldy. Bul mejede jer­lesterimiz Fransııamen sheber­lik baıqasady.