Qasym-Jomart Toqaevqa ulttyq kompanııa qyzmetiniń nátıjesi jóninde málimet berildi. Bıylǵy 8 aıda munaı jáne gaz kondensatyn óndirý, munaı tasymaldaý jáne qaıta óńdeý kórsetkishteri boıynsha ósim bar ekeni atap ótildi, dep habarlaıdy Egemen.kz Aqordanyń baspasóz qyzmetine silteme jasap.
Maǵzum Myrzaǵalıevtiń aıtýynsha, «QazMunaıGaz» UK» AQ munaıdyń otandyq brendi KEBCO (Kazakhstan Export Blend Crude Oil) óndirisin bastady. Qazirgi tańda KEBCO munaıynyń eksport kólemi turaqty túrde artyp keledi. Bul rette KEBCO munaıynyń baǵasy bıylǵy tamyz aıynda Brent munaı markasynyń baǵasynan asyp tústi.
Sondaı-aq Prezıdentke munaı óńdeý zaýyttarynan janar-jaǵarmaı jóneltý qarqyny, sonyń ishinde kúzgi jıyn-terin maýsymynda aýyl sharýashylyǵy taýaryn óndirýshilerdiń qajettiligin qamtamasyz etý isi jóninde baıandaldy. Atap aıtqanda, «QazMunaıGaz» kompanııasy egin jınaý naýqanyna 426 myń tonna dızel otynyn bólgen.
Sonymen qatar Memleket basshysyna kompanııanyń tanker flotyn keńeıtý, sonyń ishinde Kaspıı teńizi men basqa da ashyq teńiz akvatorııalarynda energetıkalyq resýrstardy tasymaldaýǵa arnalǵan iri tonnajdy tankerler sanyn kóbeıtý jumystary týraly málimet berildi.
Qasym-Jomart Toqaevqa ulttyq kompanııanyń óńirlerde júzege asyryp jatqan áleýmettik jobalary jóninde esep berildi. Atap aıtqanda, Prezıdentke Mańǵystaý oblysynyń Jańaózen qalasyn aýyzsýmen qamtamasyz etý úshin jańa sý tushytý zaýytynyń qurylysy bastalǵany jáne Astrahan – Mańǵyshlaq magıstraldy sý qubyryn rekonstrýksııalaý jumystarynyń barysy jóninde baıandaldy.
Kezdesý sońynda Memleket basshysy ınvestısııalyq jobalardy júzege asyrý, kómirsýtegi eksportyn arttyrý jáne geologııalyq barlaý jumystarynyń aýqymyn keńeıtý jóninde birqatar naqty tapsyrma berdi. Sondaı-aq Prezıdent munaı men gazdy tereń óńdeý salasyna basa mán berý mańyzdy ekenin atap ótti.