Qurlyqtyq hokkeı lıgasynda (QHL) kúsh synasyp júrgen Astananyń «Barysy» qatarynan besinshi kezdesýde utyldy. Bul joly Máskeýdiń «Dınamosyna» ese jiberdi.
Máskeý sapary jerlesterimiz úshin sátti bastalǵan edi. 12-mınýtta shvesııalyq legıoner Pontýs Oberg esep ashyp, bizdi bir qýantyp tastady. 16-mınýtta Erık O’Dell tarazy basyn teńestirdi. Úzilisten keıin qarqynyn kúrt kúsheıtken «Barystyń» oıynshylary taǵy eki shaıbany qaqpaǵa toǵytty. Bul joly Arkadıı Shestakov pen Nelson Noje mergendik tanytty. Sol sátte elordalyq klýb endi aıdyn ıelerine oıyn tizginin bere qoımas dep oıladyq. Biraq básekeniń aıaqtalýyna nebári alty mınýttaı ýaqyt qalǵanda Djordan Ýıl qatarynan eki márte nysanany dál kózdep, tarazy basyn teńestirdi. Overtaımda «Dınamonyń» baǵy jandy. Jeńis golyn Danııl Pylenkov soqty. Esep – 4:3.
Bıylǵy maýsymda jeńilisten kóz ashpaǵan «Barys» qazirgi kezde 21-oryndy qanaǵat tutýda. Bizden keıin tek Tolıattıdiń «Ladasy» men Balashıhanyń «Vıtıazi». О́ziniń kelesi kezdesýin jerlesterimiz 16 qyrkúıekte Astanada Vladıvostoktyń «Admıralymen» ótkizedi.