Májilis depýtattary Ortalyq Azııa elderi men Koreıa Respýblıkasy arasyndaǵy yntymaqtastyq máseleleri jónindegi parlament spıkerleriniń I keńesine qatysty, dep habarlaıdy Egemen.kz tómengi palatanyń baspasóz qyzmetine silteme jasap.
«Prezıdent Qasym-Jomart Toqaev aldaǵy onjyldyq Ortalyq Azııa óńiri úshin mańyzdy kezeńge aınalady dep sanaıdy. Bul rette bizge óz ekonomıkalyq múmkindikterimizdi, ortaq áleýetimizdi barynsha paıdalaný óte mańyzdy», dedi Májilis tóraǵasy Erlan Qoshanov.
Kezdesý barysynda Ortalyq Azııa elderi men Koreıa arasyndaǵy óńirlik yntymaqtastyqtyń basymdyqtaryna basa máni berildi. Májilis spıkeri óńirdegi qaýipsizdikti qamtamasyz etý basty máseleniń biri ekenine nazar aýdaryp, Qazaqstan parlamentshileri aımaqtaǵy turaqtylyqty saqtaýǵa bar kúsh-jigerin salyp jatqanyn aıtty.
Erlan Qoshanov qazirgi ýaqytta Ortalyq Azııa óńirinde ekonomıka, saıasat jáne mádenı baılanystar qarqyndy damyp jatqanyna nazar aýdardy. Munyń bári Koreıa Respýblıkasymen óńirlik yqpaldastyqty arttyrý úshin jańa múmkindikterge jol ashady.
Keńes sońynda Qazaqstan, Koreıa, Qyrǵyzstan, Tájikstan, Túrikmenstan jáne О́zbekstan parlament spıkerleri Ortalyq Azııa elderi men Koreıa Respýblıkasy arasyndaǵy baılanysty nyǵaıtý maqsatynda «Bolashaqqa baǵdarlanǵan ózara tıimdi qatynastardy damytý» taqyrybyndaǵy birlesken deklarasııany qabyldady.