Serbııanyń Belgrad qalasynda kúres túrlerinen ótip jatqan álem chempıonatynda Jámıla Baqbergenova 72 keli salmaqta synǵa túsip, qola medaldi oljalady, dep habarlaıdy Egemen.kz Týrızm jáne sport mınıstrligi Sportty damytý dıreksııasynyń baspasóz qyzmetine silteme jasap.
Belgradtaǵy álem chempıonatyn Jámıla 8/1 fınaldan bastap, alǵashqy beldesýinde serb qyzy Fannı Nagıdi aıqyn utty, shırek fınalda reseılik Ksenııa Býrakovany da jyqty, jartylaı fınalda mońǵolııalyq Davaanasan Enh Amarynnan asa almady. Qola medalǵa talasta polıak qyzy Ivona Stshalkany jeńdi.
Jámıla qyzdar arasynda álem chempıonatynan úsh márte júlde oljalaǵan tuńǵysh balýan. Byltyr da osy Belgrad qalasynda ótken álem chempıonatynda kúmis medal ıelendi, 2019 jyly Norvegııa eli uıymdastyrǵan álem chempıonatynda da kúmis medal aldy.