Asa meıirimdilikti talap etetin, sonymen qatar mindeti men júgi aıtarlyqtaı aýyr bolyp keletin mamandyq ıesi – medbıke. Medbıkeniń jumysy qıyn, tirligi qaýyrt. Naýqastyń saýlyǵyna dárigerden kem qaramaıtyn densaýlyq janashyrlary syrqattanǵan adamnyń kelip túskeninen bastap saýyǵyp, aıaǵyna turyp ketkenine deıin esh aıanbaı qyzmet etedi.
Osy oraıda naýqastardyń talap-tilekterin alǵashqy orynǵa qoıǵan, adamgershilik pen meıirimdilikti alǵa tartqan mereıli medbıkeniń biri Kerimbaeva Janar Dúısenbekqyzymen suhbat júrgizdik. Medısına salasyna 15 jyl ýaqytyn arnaǵan aq halatty abzal jan N.J. Batpenov atyndaǵy Ulttyq ǵylymı travmatologııa jáne ortopedııa ortalyǵynda eńbek etedi.
– Medısına salasyn tańdaýyńyzǵa ne sebep boldy? Bul salaǵa óz qalaýyńyzben keldińiz be?
– Bul salada jumys isteýdi bala kúnimnen bastap armandaıtynmyn. Ári qaraı oqyp, hırýrg mamandyǵyn meńgersem degen armanym da bolǵan. Alaıda keıin otbasyly bolyp, dittegen armanyma jete almadym. Biraq bul salaǵa óz qalaýymmen kelgen edim. Osy mamandyqty tańdaýyma túrtki bolǵan dúnıe - bala kúnimde teledıdardan dárigerlerge qarap qyzyǵatynmyn. Armanym dál sol qyzýshylyqtan bastaldy desem de bolady. Men medısına salasymen qosa pedagog mamanmyn. Alǵashqy jyldary medısına kolledjinde bıologııa jáne ekologııa pánderi boıynsha 8 jyl sabaq berdim. Degenmen medısına salasynan alys ketpedim. Ol jaqta sabaq bersem de, júrek ol jaqta bolmady. Astanaǵa kelip, osy jumysqa ornalasqanda, óz ornymdy tapqandaı boldym. – Jumys barysynda qandaı jaǵdaılarǵa daıyn bolý kerek? – Bizdiń jumysta ártúrli jaǵdaıǵa daıyn bolý kerek. Meniń qazirgi jumys istep júrgen bólimsheme 50 jastan joǵary, kóbine úlken kisiler túsip jatady. Sondaı-aq bul kisilerde bizge aıtqan shaǵymdarynan basqa ózderiniń de syrqattary bolady. Adamnyń ómirimen tikeleı jumys istegennen keıin bul úlken jaýapkershilikti talap etedi. Jalpy biz kez kelgen oryn alǵan jaǵdaıǵa daıyn bolýymyz qajet. Biz úshin ár sekýnd mańyzdy.
– Mamandyǵyńyzdyń eń qıyn tusy qandaı? – Men qazir tańý bóliminde jumys isteımin, ıaǵnı ár otadan keıin naýqastyń jaraqatyn tańyp, birinshi rettik aıyǵyp ketýine jaýap beremin. Endi bul kúndizgi jumys bolǵannan keıin jeńildeý, biraq jaýapkershiligi mol. Sondaı-aq postta jumys istegen kezim bolǵan. Ol jerde 24 saǵat uıqysyz júremiz, sebebi naýqastar bir táýlik boıy baqylaýda bolýy tıis. Kez kelgen sátte naýqastyń qasynan tabylý - mindet. Naýqastyń syrqatynan tolyǵymen aıyǵyp, esikten kúlip shyǵyp bara jatqanyn kórý biz úshin baqyt. Sondaı-aq naýqastar bizge alǵystaryn aıtqan kezde boıymyzdy maqtanysh sezimi kerneıdi. – Medbıke retinde sizdiń eń mańyzdy mindetterińizdi qandaı dep bilesiz? – Medbıkeniń basty mindeti – árbir pasıentti jeke tulǵa retinde qabyldaý. Sol jeke tulǵanyń quqyǵyn, ar-namysyn syılaı bilýimiz kerek. Biz syrqattarmen tikeleı qarym-qatynasta bolǵannan keıin olarmen til tabysa bilýimiz kerek. «Jyly-jyly sóıleseń jylan ininen shyǵady» degen sóz bar ǵoı. Týra sol sııaqty naýqaspen de jyly sóılesseń ol saǵan ashyla bastaıdy. Al medbıkeniń eń alǵashqy mindeti - naýqastardyń tilin taba bilý.
Dárigerler naýqastardyń janynda 24 saǵat boıy birge bolmaıdy. Al medbıke sol ýaqyt boıy birge bolǵannan keıin tipti uıqydan turǵan kezdiń ózinde kóńil kúıin baıqap, bir jeriniń aýyryp turǵanyn kóre alamyz. Biz arqyly dáriger naýqastyń aýyryp turǵanyn biledi. Biz eki jaqtyń arasyndaǵy mańyzdy kópir bolyp sanalamyz. Jalpy, medısına qyzmetiniń 80 paıyzyn medbıke atqarady.
– Medbıkeniń boıynda qandaı qasıetter bolý kerek? – Medbıkeniń boıynan tabylatyn qasıetterge keler bolsam, birinshiden adamgershilik, ekinshiden jaýapkershilik, jáne eń bastysy meıirimdilik. Ár naýqasqa óziniń ata-anańdaı qarasań onda jumys jaqsy júredi dep oılaımyn.
– Uzaq jyldyq tájirıbesi bar maman retinde izińizden qýyp kele jatqan bolashaq mamandarǵa qandaı keńes beresiz? – Qazir barlyq tehnologııalardyń beles alyp, damyp jatqan kezi. Týra sol sııaqty medısına da burynǵy orynda qalyp qoıǵan joq, kerisinshe ýaqyt ótken saıyn zamannyń talabyna saı jańa tehnologııalarmen jańaryp keledi. Bolashaq mamandarǵa óz isin jaqsy kórip, óz isine berik bolsa deımin. Kez kelgen nárseni kóńilmen jasamasańyz ol tátti shyqpaıdy. Sol sııaqty ár adam óziniń tańdaǵan mamandyǵyn jaqsy kórse, onda ol adamnan jaqsy maman shyǵady dep oılaımyn.
– Áńgimeńizge rahmet!