Májilis depýtaty Qaraqat Ábden bıliktegi basshylyq qyzmettiń jartysyn áıelder qaýymy atqarýy kerek deıdi. Bul týraly tómengi palata ókili depýtattyq saýal joldady, dep habarlaıdy Egemen.kz.
«Túrkistan oblysy ákiminiń bes birdeı orynbasary da er adamdar. Oblysta 17 aýdan ákimderiniń tek bireýi ǵana áıel adam. Oblys ákimdigine qaraıtyn 21 basqarmanyń birinde ǵana áıel adam basshy bolyp otyr. Bilikti kadrlar shoǵyrlanǵan Astana qalasynyń bes aýdanynda da áıel adamdar ákim emes», degen depýtat Úkimetke áıelderdiń saıası kóshbasshylyq qabiletin damytatyn baǵdarlama daıarlaý qajettigin atap ótti.
Qazaqstanda áıelder qaýymynyń el úshin mańyzdy sheshimder qabyldaı alatynyn da eskertti. Máshhúr Júsiptiń «meńireý áıelden meńireý urpaq týady» degen támsilin tilge tıek etken Qaraqat Ábden saýatty, sanaly áıelderdiń úni minberden estilýi tıis ekenin aıtty.