Ekibastuzǵa jylý berile bastaıdy

Kenshiler shaharyndaǵy jylý jelisin jańartý aıasynda Máshhúr Júsip kóshesi bo­ıynda bıyl jańa jylý magıs­trali salyndy. JM-2 magıs­tra­lin synaqtan ótkizý barysyn baıqaý úshin oblys ákimi Asaıyn Baıhanov Ekibastuz qalasyna arnaıy bardy. Aımaq bas­shysy synaq júrgizilip jat­qan aýmaqqa jetkenge deıin qubyrǵa berilgen qysym kompensator tyǵyzdamasyn julyp alyp, jeliden sý atqylaǵan. Iаǵnı «Dostyq» dúkeninen «Qa­zaq­stan» kınoteatry aıaldamasyna deıin magıstraldi synaqtan ótkizý kezinde jańa jáne eski qubyrlardyń túıisken jerin qosatyn tyǵyzdaǵysh kompensator isten shyqty. Abyroı bolǵanda, qubyrlar zaqymdalǵan joq. Bir kúnniń deresinde aqaý joıyldy. Endi osy magıstraldi jelini synaý jáne jýý ju­mys­tary qaıta jalǵasady. Sondaı-aq Abaı kóshesindegi úsh magıs­tral qysymmen tekserýden ótti. Bul aýmaqtarda da iske qosý aldyndaǵy daıyndyq ju­mystary júrgizilýde.

Aıta keteıik, birneshe kún buryn gıdravlıkalyq synaq­tar kezinde Ekibastuz tur­ǵyn­da­rynyń biriniń jeke aýlasyn da sý basqan edi. Oblys ákimi álgi úı ıesinen keltirilgen qo­laı­syzdyqtar úshin keshirim surady. Búginde aqaý joıylyp, aýla tazartyldy. «Júrgizilip jatqan jumystardy kópshilikke keńinen túsindirý kerek. Bizge qazirden-aq jelilerdiń osal tus­taryn anyqtap, paıda bolǵan aqaýlardy birden joıý mańyzdy. Sol úshin jańa qubyrlar joǵary qysymmen tekserilýde», dep atap ótti oblys ákimi.

Jalpy, kóktemgi jáne kúzgi gıdravlıkalyq synaqtardan keıin Ekibastuzdyń jylýmen jab­dyqtaý jelilerinde barlyǵy 388 aqaý joıyldy. Qala tur­ǵyn­da­rynan kelip túsken ótinish­ter boıynsha oramishilik jylý jelilerindegi 14 prob­le­malyq ýchaskeni jóndeý jumystary jalǵasýda. 690 kópqabatty tur­ǵyn úıdiń 665-i jylýdy qa­byldaýǵa tolyqtaı daıyn. Taǵy 25 kópqabatty baspanada ishki jylytý júıelerin jóndeý, jýý, syǵymdaý jumystary aıaq­ta­lyp qaldy.

Kómirli shahardaǵy jylý berý maýsymy 1 qazannan bas­talmaq. Jergilikti bılik ókil­deriniń málimetinshe, jylýdy qabyldaýǵa daıyndyq boıynsha barlyq jumys ýaqytyly jáne barynsha sapaly oryndalýda. Qazirgi kúni kommýnaldyq qyzmetter táýlik boıy jumys isteý rejimine kóshirilip jatyr. Jylýmen jabdyqtaýdy bastaý bir bólek, júıeni teńdestirý de mańyzdy. Jylý jelileri qyzmetteri men qalalyq turǵyn úı ınspeksııasy bólimi tarapynan ishki jylýmen jabdyqtaý júıelerin retteý jáne shetki úılerdegi gıdravlıkalyq para­metr­lerdi teńdestirý boıynsha úılesimdi jumys kútilip otyr. Oblys basshylyǵy jylý­men qamtý baǵytyndaǵy is-shara­lardy odan ári jetildire túsýdi josparlap, JM-1 jáne JM-3 jylý magıstraldaryn qaıta jańartý úshin jobalyq-sme­ta­lyq qujattamany daıyndaýdy tapsyrdy. Sebebi buǵan deıin 1973 jyly salynǵan atalmysh magıstraldiń Máshhúr Júsip kóshesi boıyndaǵy ýchas­ke­sinde aqaý oryn alǵan edi. Mamandar qubyr metalynyń 3 mm-ge deıin juqarǵanyn anyqtaǵan. So­nymen qatar jyl sońyna de­ıin JM-7/1 jańa magıs­tra­li­niń qurylysyn qolǵa alý kóz­delip otyr. Bul bir aýdan­nyń jylýdy shamadan tys kóp alyp, al ekinshisi aýmaqta jylý jetispeýshiligi oryn alǵan jaǵ­daıda qalanyń jylýmen jab­dyqtaý júıesin teńdestirýge múmkindik beredi. Ekinshi kóter­gish sorǵydan Ekibastuz JEO-na deıin tehnıkalyq sýdyń jańa rezervtik magıstraliniń qurylysy da jalǵasýda. Qazir jer qazý jumystary júrgizilip, jeli ornatylyp, bekitý armatýrasy kútilýde. Nysan qury­ly­syn jyldyń sońyna deıin aıaqtaý josparlanýda.

Jylý-elektr ortalyǵyndaǵy jóndeý jumystary da kestege sáıkes júrgizilip jatyr. Búginde 3 energetıkalyq qazandyq paı­da­lanýǵa daıyn tur. Oǵan qosa jylý berý maýsymy bas­tal­ǵanǵa deıin taǵy 3 sý jylyt­qysh qazandyq agregaty da iske qosylady. Qalǵan 4 qazandyq qazan aıynyń sońyna deıin to­ly­ǵymen jóndeledi.

«Qalany jylýmen qamtý má­selesi árbir ekibastuzdyqty alań­datady. Bizdiń mindet – bar­lyq qajetti jumysty sapaly oryndaý. Bizdiń birlese atqar­ǵan jumysymyzdyń nátı­jesi úılerdegi turaqty jylý bolýǵa tıis», dep atap ótti óńir basshysy A.Baıhanov jylý jelilerin jóndeýshilermen kezdesýde.

Pavlodar oblysy,

Ekibastuz qalasy