Bul týraly QR sıfrlyq damý, ınnovasııalar jáne aeroǵarysh ónerkásibi mınıstrliginiń baspasóz qyzmeti málim etti, dep habarlaıdy Egemen.kz
Ǵarysh zertteýshileri qaýymdastyǵy uıymdastyrǵan Halyqaralyq kongress Túrkııanyń Býrsa qalasynda 25-29 qyrkúıek aralyǵynda ótti. Is-sharany Gekmen avıasııalyq oqý ortalyǵy (GUHAM) Túrkııanyń ónerkásip jáne tehnologııalar Mınıstrligimen, Túrkııanyń ǵylymı-tehnologııalyq zertteýler keńesimen (TÜBITAK) jáne Býrsa mýnısıpalıtetiniń qoldaýymen Býrsa Saýda-ónerkásip palatasymen birlesip uıymdastyrǵan.
Atalǵan kongreske Qazaqstannyń ushqysh-ǵaryshkeri, QR sıfrlyq damý, ınnovasııalar jáne aeroǵarysh ónerkásibi mınıstrligi janyndaǵy «Qazaqstan Ǵarysh Sapary» ulttyq kompanııa Basqarmasynyń tóraǵasy Aıdyn Aıymbetov qatysty. Býrsa Saýda-ónerkásip palatasynyń ókilderimen talqylaý barysynda Aıdyn Aıymbetov tótenshe jaǵdaılar kezinde ǵaryshtyq spýtnıkterdi paıdalana otyryp jumys isteýdiń jańa ádisterine erekshe nazar aýdardy.
«Túrkııadaǵy jer silkinisi ǵaryshtyq tehnologııalar bılikke jedel aqparat alýǵa jáne usynýǵa múmkindik beretindigin kórsetti. Zardap shekken óńirlerdiń joǵary egjeı-tegjeıli spýtnıktik sýretteri osyndaı tabıǵı apattardyń saldaryn baǵalaý maqsatynda zaqymdaný kartalaryn jasaý úshin paıdalanylady», dep atap ótti Aıdyn Aıymbetov.
Tehnıkalyq sessııalarda álemdegi ǵarysh qyzmetiniń odan ári damýy qarastyrylyp, Túrkııa men basqa elderdiń ǵaryshtyq ǵylymı mıssııasynyń máseleleri qozǵaldy.
Is-sharaǵa Bolgarııa, Kanada, AQSh, Reseı, Qytaı, Germanııa, Fransııa, Avstrııa, Horvatııa, Izraıl, Italııa, Japonııa, Nıderlandy, Ispanııa, Qazaqstan, Sırııa, Ispanııa, Rýmynııa jáne Túrkııadan barlyǵy 70 astronavt, ǵaryshker jáne ǵalymdar qatysty.
Sondaı-aq kongresstiń negizgi taqyryby Túrkııa Respýblıkasynyń 100 jyldyǵyna jáne Mustafa Kemal Atatúriktiń «Bolashaq aspanda» sózderine arnaldy.