Jer marjany Baıanaýyl tórinde «Aqbetke qonǵan aqqý jyr» atty poezııa keshi ótti. Ádemi keshtiń ataýy Baıandaǵy bıik shyń – Aqbetpen astarlasýynda ózindik mán bar. Elimizdiń ár óńirinen kelgen aqyn qyzdardyń shyǵarmashylyǵy negizinen mahabbat lırıkasyna arnaldy.
Aqbet shyńynyń ańyzyna qulaq túrsek, ertede bul ólkede Aqbet qyz ǵumyr keshipti. Ákesi Búrkitbaı Aqbet sulýdy qaýsaǵan shalǵa uzatpaq bolǵan eken. Ǵashyǵymen qol ustasyp qashýǵa nıettengen Aqbettiń joly kesilip, jigit óltiriledi de, qyz úıge qamalady. Qaıǵy jutqan arý ǵashyǵymen birge tańdy qarsy alatyn shyńǵa shyǵyp, tóńiregine sońǵy ret kóz salyp, quzdan qulap mert bolypty. Qoınyna osyndaı mahabbat baıanyn búkken Aqbet shyńy taý ǵana emes, sezimniń de rámizi desek bolady.
Shymyldyǵy Farıza aqynnyń «О́leń, men seni aıalap ótem» jyrymen túrilgen kesh tizginin óńirge belgili jas aqyndar, kórermen kózaıymyna aınalǵan Elaman Qabdyláshim men Aıbek Oralhan ustady. Poezııa keshinde «Alash» halyqaralyq ádebı syılyǵynyń laýreaty ári tanymal telejýrnalıst Tanakóz Tolqynqyzy, «Aqparat salasynyń úzdigi», aqtaýlyq Anar Shamshadınova, Halyqaralyq «Shabyt» festıvaliniń jeńimpazy Saǵynysh Namazshamova, Astana qalasynan jas aqyn Aızada Rahymjanova, aqyn ári tanymal telejýrnalıst Tolqyn Qabylsha, ekibastuzdyq qalamger, aqyn Janargúl Qadyrova, Halyqaralyq Túrki álemi jas Jazýshylar odaǵynyń múshesi Gúlnaz Faızýlla qatysyp, jyrsúıer qaýymdy lırıkaǵa toly óleńderimen sýsyndatty.
Biz tanystyrǵan aqyn qyzdardyń Baıan eline bóteni joq: Tanakóz, Saǵynysh, Anar, osy eldiń týmasy Janargúl jas aqyn-jazýshylardyń «Baıanaýyl – 2007» forýmyna qatysyp, baıanaýyldyqtardy jyrǵa bólegeni esimizde. Al Aızada Musa Shormanovtyń 200 jyldyq toıy aıasynda uıymdastyrylǵan múshaırada «Kemeńger» óleńimen bas júldeni jeńip alǵan. Anar Jasybaıǵa arnap jyr jazsa, Tolqyn bıyl kıeli topyraqta Máshhúr Júsip Kópeıuly, Júsipbek Aımaýytuly týraly derekti fılmder túsirgen. Gúlnaz qazaq aqyndarynyń jyrlaryn túrik, ázerbaıjan tilderine aýdaryp, túrkitildes elder arasynda rýhanı kópir bolyp júr.
Jeti aqqýǵa uqsaǵan jeti aqynǵa appaq gúl shoqtary tartý etilip, baıanaýyldyq jáne ekibastuzdyq óner ıeleri qalamgerlerdiń qurmetine ánnen shashý shashty. Jyr merekesinde kesh qonaqtarymen birge baıanaýyldyq ónerpazdar da óleń oqydy. Tanakóz Tolqynqyzynyń «Osylaı da adam saǵynady eken...», Janargúl Qadyrovanyń «Jetinshi qabat», Aızada Rahymjanovanyń «Biz ekeýmiz birge bolsaq...», Tolqyn Qabylshanyń «Adaldyq» óleńin oqyǵan órenderdiń ónerin jurt súısine tamashalap, qoshemet kórsetti.
Pavlodar oblysynyń Qurmetti azamaty, memlekettik qyzmet ardageri, el aǵasy Qorabaı Shákirov sóz alyp, rýhanııat salasyndaǵy ózin tolǵandyryp júrgen jaıttardy aqyndarǵa amanat retinde jetkizdi. Batagóı qarııa Ábdiqomar Salyquly aqyndarǵa aq batasyn berse, jergilikti aqyndar – Tańat Ahatov pen Jeńisbek Pázil jyr oqydy. Al «Mádenıet salasynyń úzdigi» Jamby Máshim sińlilerine aq jol tiledi. Aqyndarǵa oblys atynan Máshhúr Júsip Kópeıulynyń 10-tomdyq jınaǵy syıǵa tartyldy.
Pavlodar oblysy,
Baıanaýyl aýdany