Kerekýde shóp baǵasy ár óńirde ártúrli baǵamen bosatylyp jatyr. Qyrdaǵy aýyldarda bıyl shabyndyqtyń jutań bolýynan mal azyǵyn syrttan tasýǵa kóshti. Ortasha eseppen salmaǵy 300 kılogramdyq bir oramanyń quny 7-15 myń teńge turady.
Maı jáne Baıanaýyl aýdandaryndaǵy mal baqqan aǵaıyn qurǵaqshylyq saldarynan shabyndyq jerlerge ýaqytynda shyǵa almady. Tek bul kemshiliktiń ornyn tamyz aıynda bastalǵan jańbyrly kúnder toltyrǵandaı bolǵan. Alaıda jazdyń balaýsa shóbindeı emes, kúzgi shaýyp jatqan shóptiń sapasy kóńilden shyqpaı tur. Maı aýdanynyń ákimi Aǵybaı Ámirınniń aqparynsha, salmaǵy 270-300 kg tartatyn bir orama shóptiń quny 7 myń teńgeden 11 myń teńgege deıin. Al shilde aıynda syrttan jetkizilgen túktelgen (18-20 kg-lyq) shóptiń baǵasy 1200 teńge bolsa, qazirgi kúni ony shabyndyqtan 650 teńgege, jetkizip berse, 800 teńgege satyp alýǵa bolady. Bıyl óńirdegi qystaqtarǵa shamamen 122 myń tonna mal azyǵy jetkizilýi kerek. Onyń 50-60 paıyzyn jergilikti shabyndyqtar qamtamasyz etedi. Aıtpaqshy, aýdanda aldaǵy jyldary «Kólibaı» kóltabanyn qalpyna keltirý josparlanyp otyr. Ol iske qosylsa, jańadan 16,5 myń gektar shabyndyq paıda bolady.
Baıanaýyl aýdanynyń ákimi Ardaq Kisentaev bir orama shóptiń quny 10-14 myń teńge turatynyn aıtady. Shabyndyqtan alyp ketse, 10 myń teńgeden bosatady. Aımaýytov, Toraıǵyr, Maıqaıyń, Birlik eldi mekenderiniń jurtshylyǵy shópti ózge aımaqtardan satyp alyp jatyr. Al Jańatilek, Sátbaev, Muryntal aýyldaryna mal azyǵy Qaratomardaǵy shabyndyqtardan jetkizilip jatyr. Búginde atalǵan aýdan aýmaǵynda 96 myń iri qara, 65 myń jylqy, 137 myńdaı usaq mal bar.