Kómir kenishteriniń qojaıyndary burynǵy ánderine qaıta basyp, kómir baǵasyn bıyl da kóterip jiberdi. Qazirgi kúni oblysta otynnyń eń arzany – 10 myń (tonnasyna), qymbaty 25 myń teńgege deıin jetip tur.
Ekibastuzdaǵy «Bogatyr kómir» kenishiniń kómirin negizinen áleýmettik nysandardy jylytýǵa jáne óndiristik jaǵdaıda paıdalanatyndyqtan, eń arzan baǵa atalǵan uıymǵa tıesili. Negizi kenishten barlyǵyna birdeı baǵada 3 556 teńgeden bosatylady. Ol Pavlodar qalasyna jetip, temirjol tuıyqtaryna túskende 10 myń teńgeden satylyp jatqanyn baıqaımyz. Jeke úıler tarapynan alýshysy az bolǵanyna qaramastan, bıyl kenish onyń baǵasyn baqandaı 600 teńgege ósirdi. О́ńirlik energetıka jáne turǵyn úı-kommýnaldyq sharýashylyǵy basqarmasy jylýmen qamtý bóliminiń bas mamany Dáýlet Qabdyshevtyń málimetinshe, «Móıkóbe» kenishinde kómir áleýmettik nysandarǵa – 7 000, jeke azamattarǵa 8 000 teńgeden satylyp jatyr. Byltyrǵymen salystyrǵanda tonnasy 500 teńgege qymbattaǵan. Al oblys ortalyǵynyń turǵyndary ony jetkizý qunymen eseptegende 16 myń teńgege satyp ala alady. Qazir Pavlodar qalasyndaǵy bazalarda kómirdiń 20 myń tonnasy bar. Alys aýdandarda baıanaýyldyq mıneraldy otynnyń bir tonnasy 18-25 myń teńgege deıin jetip tur.
Jalpy, qysqy jylytý maýsymy úshin óńirge 551 myń tonna qatty otyn qajet bolsa, sonyń 128 myńyn jeke úıler alýy kerek. Áleýmettik nysandar ózderi suranys jasaǵan kólemniń 40 paıyzyn tasyp úlgergen, ózgesin kestege sáıkes jetkizip jatyr. Bilim, densaýlyq saqtaý salalarynda jáne ózge de áleýmettik mekemelerde qazirdiń ózinde 2 aıǵa jeterlik qor jınalǵan.