Zaısanda týyp, Baıanaýylda túlegen, Aqkól Jaıylmadan aıtys alamanyna at qosyp, qazaq aıtysynyń «Solaqaı serisi», «Kerekýdiń Isasy» atanǵan aıtysker aqyn Serik Qusanbaev 60 jasqa toldy. О́ner ıesiniń qurmetine Pavlodarda «Aqıqattyń aqbozyn alshańdatqan» atty shyǵarmashylyq kesh ótti.
Qazaqtyń ulyq óneri sonaý 80-jyldardyń aıaǵynda qaıta jańǵyryp, sahna tórine ozǵanda Serik Qusanbaev Pavlodar oblysynyń 50 jyldyǵynda alǵash ret terme oryndaýǵa barypty. Sol jolǵy aıtys sıqyry aǵamyzdy birden baýrap áketip, ózi de kóp uzamaı aıtys alamanyna qosylyp ketedi.
«...Shabytsyz jyr shyǵa ma, án shyǵa ma?
Qulyqsyz kók dónendi qamshylama.
Terbelgen teńiz bolsa, qazaq jyry,
Bizdiki soǵan qosar tamshy ǵana»,
dep jyrlaǵan eken aqyn.
Poezııa men aıtys, termeshilik, jýrnalıstıka sekildi birneshe ónerdi teń alyp júrgen Sekeńniń ǵumyrynyń deni Ertis-Baıan óńirinde órbidi. Aqparat salasynda 20 jylǵa jýyq qyzmet etip, júırik qalamyn rýhanııat salasyna, ulttyq rýh baǵytynda sermedi. Oramdy oı, sergek sanamen jazylǵan dúnıeler óz nátıjesin bermeı qalǵan joq. Ne jazsa da, tap-tuınaqtaı etip tógilte jazatyn Sekeń aıtystaǵy adýyndy shabysyn gazet betinde de kórsetip keledi.
Shyǵarmashylyq keshke arnaıy kelgen aıtysker aqyn, Parlament Májilisiniń depýtaty Amanjol Áltaev, ǵalym Qoılybaı Asanov, aıtysker aqyn, fılologııa ǵylymdarynyń kandıdaty Serikzat Dúısenǵazy, kóne maqamdardy keıingi urpaqqa nasıhattaýshy, jyrshy Qudaıberdi Myrzabek, aqyn Dáýletkereı Kápuly sóz alyp, Sekeńniń rýhanııat salasyndaǵy eseli eńbegin joǵary baǵalaıtyndaryn jetkizdi. «Aıtys – qazaq halqynyń ulttyq brendi. El táýelsizdigin endi alyp, eńse kótere bastaǵan jyldar ult tarıhy úshin syńdarly kezeń bolatyn. Táýelsiz eldiń irgesin endi bekemdep eleń-alań kúı keshken halyq sanasyna ulttyq ıdeologııa asa qajet bolyp turǵan shaq edi. Qoǵamda oryn alǵan ózekti problemalar Serik aqynnyń jyrlarynda tolyqtaı kórinis taýyp otyrdy, basyn báıgege tigip shyndyqty jyrlady», dedi Qoılybaı Asanov.
Aıtys ardagerlerimen kezdesý jas aqyndarǵa erekshe áser syılady. «Altyn dombyra» ıegeri Aspanbek Shuǵataev arnaý jyr arnasa, jergilikti jas aqyndar jyrdan shashý shashyp, qurmet kórsetti. О́ner ıesine kerekýlik ónersúıer qaýym at mingizip, ıyǵyna shapan japty. Kesh ıesiniń ózi osy tamasha sátti paıdalanyp, aıtysqa kıgen qyzyl shapanyn Buqar jyraý atyndaǵy ádebıet jáne óner mýzeıine tabystady.
Aıtyp óteıik, Serik Qusanbaev aıtys alamanynda olja salyp, dáýirlep turǵan shaǵynda 13 márte bas júldeni oljalaǵan eken. Jyrlary beıne bir Altaıdyń aq jaýynyndaı sebelep, nárli de árli bolyp keletin, ár óleńi taǵdyrly aqynnyń denine saýlyq, otbasyna amandyq tileımiz.
Pavlodar oblysy