Memleket basshysy Qasym-Jomart Toqaevtyń tapsyrmasymen jer silkinisi saldaryn joıýǵa járdemdesý úshin Aýǵanstanǵa barǵan Qazaqstan TJM kúshteri men quraldary elge oraldy, dep habarlaıdy Egemen.kz.
Qazaqstan TJM baspasóz qyzmetiniń málimetinshe, TJM Azamattyq qorǵanys jáne áskerı bólimderi komıteti tóraǵasynyń mindetin atqarýshy general-maıor Ularbek Ábikeevtiń basshylyǵymen qoıylǵan mindetterdi abyroımen oryndaǵan Qazaqstan qutqarýshylar jasaǵyndaǵy barlyq 45 adamnyń ishinde TJM Respýblıkalyq jedel-qutqarý jasaǵynyń qutqarýshylary, kınologııalyq eseptoptary, Apattar medısınasy ortalyǵynyń dárigerleri – feldsherleri boldy.
Jer silkinisi aımaǵynan oralǵan qutqarýshylardy áýejaıda áriptesteri, týystary, jaqyndary qarsy aldy. Sonymen qatar qutqarýshylardy kezekti ret qarsy alǵan «Lider.kz» qozǵalysynyń volonterleri qutqarýshy ıtter Charlı, Evro, Djeıkobqa medaldar daıyndaǵan eken.
Gýmanıtarlyq mıssııaǵa qatysýshylardy Qazaqstannyń TJ vıse-mınıstri general-maıor Erlan Nurpeıisov quttyqtap, bundaı isterden bizdiń mamandar kásibı biliktilikterin arttyratynyn jáne túrli jaǵdaıda jumys isteý daǵdysyn jetildiretinin atap ótti.
Aýǵanstandaǵy izdestirý-qutqarý jumystaryn júrgizý barysynda Qazaqstan TJM qutqarýshylary 83 jergilikti turǵynǵa medısınalyq kómek kórsetip, 211 úı fragmentiniń úıindisin bólshektegen, Naıbrofı eldi mekeninde 700 qıraǵan úılerdiń ýchaskelerin teksergen. Qutqarýshylar qaıtys bolǵan 1 balanyń denesin taýyp, alyp shyqqan.
Qatty shańdy daýyldan zardap shekken 9 shatyrly qalashyqtyń ornalasý oryndarynda tekserý júrgizgen Qazaqstan qutqarýshylary Sııahan eldi mekeninde tolyǵymen qıraǵan úılerdiń astyn da tekserip, Cholk eldi mekeninde úıindilerdi bólshekteý jumystaryn júrgizdi.
Aýǵanstan bıligi joıqyn jer silkinisi saldaryn joıýǵa kómek kórsetkeni úshin elge oralar aldynda Qazaqstan qutqarýshylaryna alǵys bildirdi.