Búgin Astanadaǵy Qutqarýshylar alleıasynda qaza tapqan qyzmetkerlerdi eske alý rásimi ótip, gúl shoqtary qoıyldy, dep habarlaıdy Egemen.kz elorda ákimdiginiń baspasóz qyzmetine silteme jasap.
Is-sharaǵa Tótenshe jaǵdaılar mınıstri Syrym Sháriphanov, TJD basshylary jáne qyzmet babynda qaza tapqan qyzmetkerlerdiń jaqyndary men týystary qatysty.
Is-shara sońynda azamattyq qorǵaý organdaryna jańadan kelgen qyzmetkerlerden ant qabyldaý rásimi ótti.
Eske sala ketsek, 19 qazan kúni elimizde jyl saıyn Qutqarýshylar kúni atap ótiledi.
«Qutqarýshylar kúniniń qarsańynda osyndaı eske alý sharasyn ótkizip otyrmyz. Táýelsizdik jyldarynda 69 órt sóndirýshi, qutqarýshy, ofıser, serjant zardap shekken halyqqa kómektesip, qyzmet barysynda erlikpen qaza tapqan. Erlikpen qaza tapqandar máńgi el esinde qalady. Biz árdaıym ýaqytynda kómek kórsetýimiz kerek jáne tótenshe jaǵdaıdyń aldyn alýymyz qajet», dedi mınıstr.
Sondaı-aq Syrym Sháriphanov alda kele jatqan merekemen quttyqtady.
«Qurmetti, áriptester! Sizderge zor densaýlyq pen jaqsylyq tileımin! Jumystaryńyz alǵa basa bersin! Biz qutqarý jumysynan buryn aldyn alý máselesine kóbirek kóńil bólýimiz kerek. Bastysy elimiz gúldene bersin! Tótenshe jaǵdaılar bolmasyn!», dep túıindedi general-maıor Syrym Sháriphanov.