Senator Alısher Satvaldıev Úkimet basshysy Álıhan Smaıylovtyń atyna joldaǵan depýtattyq saýalynda Túrkistan oblysynyń Saıram aýdanyndaǵy ınfraqurylymnyń ózekti máselelerin kóterdi, dep habarlaıdy Egemen.kz.
Senatordyń aıtýynsha, halyqty sapaly aýyz sý jáne elektrmen qamtamasyz etý úshin ınjenerlik ınfraqurylymdy shuǵyl damytý qajet.
«Mysal úshin, Qarabulaq aýyldyq okrýgindegi sapaly aýyz sýmen qamtamasyz etý máselesi ózekti kúıinde qalyp otyr. 59 myńǵa jýyq halqy bar aýyl okrýgi turǵyndarynyń tek 60 paıyzy ǵana aýyz sýmen qamtylǵan. Aýyl halqynyń 30-35 paıyzy qudyq jáne ózderi qazyp alǵan sý uńǵymalaryn paıdalanýǵa májbúr. Turǵyndar arasynda ishek aýrýlaryna shaldyqqandar bar. Aýyl kósheleriniń jaǵdaıy máz emes, 70 paıyzy jóndeýdi qajet etedi», dedi senator.
Depýtat sonymen qatar aýdandaǵy halyq sanynyń ósýine baılanysty jańa turǵyn úıler salý qajettigin aıtty. Ol sondaı-aq Saıram aýdanynda jerge kezekte 56 myńnan astam azamat turǵanyn habarlady.
«Osy máseleni sheshý úshin Saıram aýdanynyń jer ýchaskelerinde ınjenerlik kommýnıkasııalar salý josparlanyp otyr. Quny 891 mln teńgege jobalyq qujattama daıyndaldy. Sonymen qatar aýdan turǵyndaryn turaqty elektr jaryǵymen qamtamasyz etý maqsatynda Aqsýkent aýylynan qosalqy elektr stansııasyn salý úshin quny – 1,7 mlrd teńgeni quraıtyn jobalyq smetalyq qujattar ázirlengen. Joǵaryda atalǵan máseleler boıynsha barlyq tıisti qujattar rásimdelip, respýblıkalyq bıýdjetten qarjylandyrý boıynsha ótinimder joldanǵan», dedi depýtat.
Senator osyǵan baılanysty Álıhan Smaıylovtan «Qýatty óńirler – el damýynyń draıveri» ulttyq jobasy aıasynda aıtylǵan máselelerdi respýblıkalyq bıýdjetten qarjylandyrý máselesin qaraýdy surady.