Tramvaı kóligi jaıynda sóz qozǵala qalsa, Pavlodar qalasy alǵashqy bolyp aýyzǵa iligeri anyq. Búginde shahar rámiziniń birine aınalyp úlgergen relsti kólik ekologııalyq jaǵynan da tıimdi. Aldaǵy ýaqytta qalanyń shetkeri shaǵyn aýdandaryna da avtonomdy tramvaılar júre bastaıdy.
Pavlodar qalasyndaǵy tramvaı joldarynyń jalpy uzyndyǵy búginde 90 shaqyrymdy quraıdy. Kólik kásipornynyń ıeligindegi 111 vagon jolaýshylarǵa úzbeı qyzmet kórsetip, uıym endigi arada jańa baǵyttardy ashýǵa talpynyp otyr.
Shahardyń ońtústik-batys bóliginde jańadan salynyp jatqan «Dostyq» shaǵyn aýdanyna keler jyly tramvaı kólikteri qatynaı bastaýy múmkin. Bul úshin aýmaqqa elektrli baılanys jelilerin ustap turatyn beton baǵandar salýdyń qajettiligi joq kórinedi. Tramvaı parkiniń habarlaýynsha, atalǵan baǵytta avtonomdy túrde jumys isteıtin vagondar jolǵa shyǵady.
Relsti kóliktiń jańa tarmaǵy Nazarbaev dańǵylynan JEO joly arqyly qozǵalyp, Ladojskaıa kóshesin basyp ótedi. Vagondardyń jalpy araqashyqtyǵy 7 mınýtty quramaq. Tramvaı jolyn uzartý jobasy shamamen 2 mlrd teńgege baǵalanyp otyr. «Tramvaı basqarmasy» AQ basqarma tóraǵasy Mýslım Mahmýdovtyń aıtýynsha, jańa tarmaqtyń qurylysy keler jyly bastalýy múmkin. Ol nebári 9 aıǵa sozylady dep josparlanǵan. Barlyǵy sátti júzege assa, jańa baǵyttaǵy relsti jol qala bıliginiń ıeligine beriledi.
«Dostyq» shaǵyn aýdanyna jolaýshylardy jetkizý úshin jańadan avtonomdy túrde jumys isteıtin 20 tramvaı satyp alý kózdelgen. Tramvaılar qýattalǵan akkýmýlıatordyń kómegimen jyljıtyn bolady. Elektr baǵandary men symdardyń qajeti joq. Mundaı avtonomdy tramvaılardy iske qosý shahardaǵy keleshegi zor jańa jelilerdi ómirsheń etýge múmkindik beredi. Mysal úshin, Ekinshi Pavlodar men Ýsolka shaǵyn aýdandarynda jańa tarmaqtar paıda bolýy ǵajap emes. Eger kózdelip otyrǵan jobadan qarjy únemdelse, jańa tarmaqtar salynady» dep jazylǵan basqarmanyń habarlamasynda.
Ekinshi Pavlodar shaǵyn aýdanynda tramvaı júrgizý – kópten beri qozǵalyp kele jatqan másele. Sebebi bul aýmaqtaǵy turǵyndar avtobýs marshrýttarynyń azdyǵyna jáne olardyń mejeli ýaqytynan kóp keshigetinine jıi shaǵymdanady. Ásirese qys mezgilinde problema kóp týyndaıdy. Eger tramvaı tarmaǵy salynsa, jolaýshylardyń júrip-turýy jeńildeı túser edi. Qazirgi kúni Nazarbaev dańǵyly, Estaı, Malaısary kósheleri arqyly shaǵyn aýdanǵa jańa relsti jol salý kózdelip te otyr. Jańa tarmaq Rossııskaıa kóshesi arqyly aınalyp, Nurmaǵambetov kóshesine túsedi de, Temirjol vokzalyna keledi. Osylaısha, qalanyń shyǵys aýmaǵynda relsti joldyń tolyq sıkli paıda bolýy múmkin. Jobalaýshylar buǵan balama retinde Gerıng jáne Suraǵanov kóshelerin de usynady. Qala bıligi bul eki jobanyń qaısysy qarjy jaǵynan tıimdi bolady dep oılanyp otyrǵandaı.
Elimiz boıynsha tramvaı sanaýly ǵana shaharda saqtalyp qalǵan. Memleket basshysy Qasym-Jomart Toqaev byltyr óńirimizge jumys saparymen kelgende Pavlodar qalasyndaǵy tramvaı júıesin damytýdy jalǵastyryp, quramdardy jańartýdy jedeldetý qajettigin tapsyrǵan edi. «Menińshe, Pavlodarda tramvaıdy saqtap qalý qajet. Eger qajet bolsa, joldardy jańǵyrtyp, jańa, dybyssyz, tramvaılar satyp alý kerek shyǵar. Biraq tramvaı – ózinshe tartymdy kólik túri. Eýropanyń kóptegen damyǵan qalasynda tramvaılar kedergisiz júredi. Bul – jergilikti turǵyndar unatatyn ekologııalyq jáne yńǵaıly kólik. Tramvaı júıesin damytýdy jalǵastyryp, quramdardy jańartýdy jedeldetý kerek», degen edi Prezıdent.
Tramvaı parki aldaǵy ýaqytta jańa jol tarmaqtarymen qosa, jańadan 70 tramvaı satyp alýdy josparǵa engizdi.
PAVLODAR