Erteń Qytaıdyń Hanchjoý qalasynda IV jazǵy Azııa Para oıyndarynyń alaýy tutanady. Tórt jylda bir aınalyp soǵatyn Azııa alamanyna sańlaqtarymyz 14 sport túrinen qatysady. Olardyń arasynda bochchadan da sportshylarymyz synǵa túsedi, dep habarlaıdy Egemen.kz.
Qazaqstan bochcha federasııasynyń prezıdenti, Senat Tóraǵasy Máýlen Áshimbaev ulttyq qurama jazǵy Azııa Para oıyndaryna qatysý joldamasyn alǵash ret ıelengenin aıtty.
«Sportshylarymyz Hanchjoýda jattyǵýlaryn ótkizip, daıyndyqtaryn pysyqtap jatyr. Jerebe tartýdyń nátıjesinde bizdiń komanda Qytaı, Koreıa, Japonııa, Taıland jáne Iran quramalarymen bir topqa tústi. Aldaǵy jarysta atletterimizge jeńis tileımiz. Sońǵy ýaqytta bochcha sporty el kóleminde qarqyndy damyp keledi. Qazirdiń ózinde sportshylarymyz birqatar halyqaralyq jarystarǵa qatysyp úlgerdi. Qyzyǵýshylardyń da qatary aıtarlyqtaı artyp kele jatqanyn atap ótken jón. Qazaqstan bochcha federasııasy aldaǵy ýaqytta da bochchashylarymyzǵa qoldaý kórsetip, osy baǵyttaǵy jumysty júıeli túrde jalǵastyra beredi», dedi M.Áshimbaev.
Qytaıdyń Hanchjoý qalasynda ótetin IV jazǵy Azııa para oıyndary 28 qazanǵa deıin ótedi.