Qorǵanys mınıstrligi Tárbıe jáne ıdeologııalyq jumys jáne Túrkistan oblysy qorǵanys isteri jónindegi departamentteriniń bastyqtary ádilet polkovnıgi Tileýhan Basqojaev pen polkovnık Nurmahanbet Dúısebaev ekinshi dúnıejúzilik soǵysynyń ardageri 96 jastaǵy Ábjappar Daırabaıulyn kele jatqan aıtýly mereke – Respýblıka kúnimen quttyqtady, dep habarlaıdy Egemen.kz atalǵan vedomstvoǵa silteme jasap.
Ábjappar Daırabaıuly 1927 jyly 1 qańtarda Túrkistan aýdany Tartoǵaı aýylynda dúnıege kelgen. 1932 jyldan bastap Túrkistan qalasynyń balalar úıinde tárbıelenip, sodan keıin úlken aǵasy Bımash Daırabaıulynyń qamqorlyǵynda bolǵan. Bes jasynda ashtyqtan aman qalǵan ol ekinshi dúnıejúzilik soǵysy bastalǵan shaqta nebári 14 jasta edi.
Á.Daırabaıuly 16 jasynan bastap Belarýs jáne Ýkraına maıdandarynda soǵysyp, Polshany azat etýge qatysyp, «Otan soǵysy» ordenimen jáne medaldarmen marapattalǵan.
Elge oralǵan soń muǵalim bolyp jumys istegen. Soǵys ardagerleri qalalyq keńesiniń tóraǵasy boldy. Aqsaqal eki ul, úsh qyz tárbıelep ósirgen.