«Iаndeks Qazaqstan» IT bilim berý naryǵyna GPT tehnologııalaryn engizdi. Halyqqa IT salasyndaǵy jańa mamandyqty ıgerýge kómektesetin «Iаndeks Praktıkým» onlaın bilim berý qyzmeti stýdentterge arnalǵan generatıvti keńesterdi iske qosty. Bul týraly «Digital Bridge 2023» forýmynyń «Jedeldetilgen oqytý: bilim berýdegi GPT syn-qaterleri men múmkindikteri» paneldik sessııasynda Ilıa Kýrmyshev habarlady. «Iаndeks praktıkým» stýdentterine arnalǵan generatıvti keńester – elimizdegi IT bilim berý salasyndaǵy alǵashqy GPT keısi.
Búginde tájirıbede eki fýnksııa bar – «Neırondyq jelide naqtylaý» jáne «Qysqasha qaıtalaý». Neırojeli teorııanyń kez kelgen kúrdeli sátin ózgeshe túsindiredi jáne ótken taqyryptardy qaıtalaýǵa kómektesedi. Eger stýdent sabaqtyń bir bóligin túsinbese, mátindegi qajetti fragmentti bólip alyp, ssenarııdi qosymsha derekkózderge qosady. Kúzdiń sońyna deıin «YandexGPT» praktıkalyq trenajerlarda paıda bolyp, neırondyq jeli kodtaǵy qatelerdi tabýǵa jáne olardy túsindirýge kómektesedi.
– Otandastarymyzdyń bilim berý úderisinde eń zamanaýı tehnologııalardy qoldanýǵa múmkindigi bar ekenine qýanyshtymyn. IT mamandyqtaryn oqytý úderisinde generatıvti neırondyq jelilerdi paıdalaný oqýdy odan ári jekelendirýge jáne tıimdi etýge kómektesedi, – dep túsindirdi Ǵylym jáne joǵary bilim vıse-mınıstri Kamıl Aqatov.
Bul joba bilim berý baǵdarlamalarynyń sapasyn jaqsartady. «Iаndekstiń» mashınalyq oqytý salasyndaǵy tehnologııalar men tájirıbesine júginý – stýdentterdi yntalandyra túsedi. Til modeli praktıkýmnyń teorııalyq materıaldarynyń jelisinde oqytylady, al jaýaptardyń sapasy men dáldigin kýrs sarapshylary tekseredi. Qazir «YandexGPT» týdyrǵan jańa múmkindikter veb-nusqada jáne «Iаndeks praktıkýmnyń» mobıldi qosymshasynda qoljetimdi.
Buryn bul joba eldiń domendik aımaǵynda iske qosylyp, 2023 jyldyń tamyzynda kýrstardy teńgemen tóleý múmkindigi týdy. Qazirgi ýaqytta praktıkýmda otandastarymyzǵa baǵdarlamalaý, derekterdi taldaý, marketıng, menedjment, dızaın jáne basqa da IT baǵyttar boıynsha 90-nan asa kýrs qoljetimdi. Tipti jańadan bastaǵandarǵa, áýesqoılarǵa, osy mamandyqta damyǵysy keletinderge de arnalǵan jeke kýrstar bar. Oqytý «Iаndekstiń» jeke tehnologııalyq platformasynda ótedi. Buǵan qosymsha teorııany, praktıkalyq tapsyrmalardy portfolıoǵa salýǵa bolatyn qorytyndy jobalary da bar.
– Biz «Iаndeks praktıkýmynda» bilikti IT mamandardy daıarlaýǵa yqpal ete alatynymyzdy maqtan tutamyz jáne sol arqyly Qazaqstanda IT ındýstrııanyń damýyna óz úlesimizdi qosamyz. Neırondyq jelilik keńesterdiń nátıjesinde semınarda oqytý ár stýdenttiń qajettilikteri men daıyndyq deńgeıine beıimdeledi, al sıfrlyq daǵdylar qoljetimdi bolady, – dep túsindirgen edi «Iаndeks araktıkýmnyń» dırektory Ilıa Kýrmyshev.
Qazaqstandy sıfrlandyrý jónindegi ulttyq jobanyń mańyzdy bóligi – IT salasyndaǵy bilim berý. 2025 jylǵa deıin memleketimiz keminde 100 myń IT kadr daıarlaýǵa nıetti. Jumys berýshiler tarapynan da suranys bar. Osy kúni aqparattyq tehnologııalar salasyndaǵy mamandar eldegi eń suranysqa ıe 5 mamandyqtyń qatarynda. Statıstıkaǵa sáıkes, ótken jylmen salystyrǵanda bolashaq IT mamandarynyń sany shamamen 30 paıyzǵa ósken. Bul – jaqsy kórsetkish. Aqparattandyrýdy damytýdyń aıqyndaýshy perspektıvasy jańa IT mamandaryn daıarlaýdy qajet etedi. Sıfrlyq damý, ınnovasııalar jáne aeroǵarysh ónerkásibi mınıstrligi 20 zamanaýı baǵdarlamalaý mektebin ashý, IT baǵdarlamalaý mektepterine 20 myń vaýcher (oqýǵa grant) bólý, beıindi ýnıversıtetterdiń óńirlik ýnıversıtetterge qamqorlyq kórsetý syndy isterdi atqaryp jatyr.