Májilis depýtaty Abzal Quspan 2024 jyldan bastap Úkimet zańdy qazaqsha jazatynyn aıtty, dep habarlaıdy Egemen.kz Azattyq Ruhy saıtyna silteme jasap.
Májilis depýtaty Abzal Quspan buǵan deıin de Qazaqstanda zańdar oryssha jazylyp, qazaq tiline aýdarylatynyn saýaldarynda birneshe ret aıtqan.
«Búgin Májilis komıtetinde otyrysty júrgizgen depýtat Únzıla Shapaqqyzy bul másele boıynsha Úkimetke saýal joldady. Bárimiz qoldadyq. Sodan keıin Úkimettiń atynan vıse-premerdiń qoly qoıylǵan qaǵaz keldi. Onda «2024 jyldan bastap zańdar qazaq tilinde daıyndalady» dep jazylǵan. Biraq vıse-premer Altaı Kólginov qyzmetinen ketti. Alaıda ol ketkenimen, Úkimet ornynda ǵoı. Sondyqtan olardyń ýádelerine senip otyrmyz», dedi Abzal Quspan.
Sondaı-aq depýtat eki zańdy qazaq tilinde jazyp jatqanyn atap ótti.
«Mysaly, men 2 zań jobasyn daıyndap jatyrmyn. Onyń attaryn aıta almaımyn. Biraq olardy qazaq tilinde daıyndap jatyrmyn. Zań shyǵarý bastamasy depýtattardyń da qolynda bar. Biraq bizde negizinen Úkimet (zańdy) daıyndaıdy. Endi 2024 jyldyń 1 qańtarynan bastap kóremiz. Osy máselege qaıta oralamyz», dedi Abzal Quspan.
Depýtat hatta zańdar 2024 jyldan bastap memlekettik tilde jazylady dep kórsetilgenin aıtty.
«Hatta Altaı Kólginovtyń qoly qoıylǵan. Adam aýysqanymen, Úkimet qol qoıdy ǵoı. Muny Úkimettiń pozısııasy dep túsinemiz. Úkimet ýádesinde tura ma, turmaı ma, bul – keler jyldyń enshisindegi sharýa», dedi ol.