Atyraýlyq sýretshi Nazerke Ishanova Ispanııada ótken halyqaralyq baıqaýdyń birinshi júldesin ıelenip, saltanatty marapattaý rásimine shaqyrtý aldy.
«Atyraý-Aqparat» JShS-da baspa dızaıneri bolyp jumys isteıtin N.Ishanova túrli kartınany elektrondy qalammen planshetke salady. Bıylǵy qyrkúıekte Ispanııada ótken sýretshilerdiń «Ýsy Dalı» baıqaýynyń «Digital Painting» atalymyna óz týyndysyn jibergen. «Bul baıqaýǵa jahannyń 60 elinen 150 sýretshi qatysty. Men 26-35 jas aralyǵyndaǵy úmitkerler tobyna «Bári bir adamnyń bastamasynan bastalady» atty sýretimdi jibergen edim. Qazan aıynyń basynda sýrettiń tekserilgeni, baıqaýǵa qabyldanǵany týraly habar aldym. Al keshe halyqaralyq baıqaý qorytyndysy boıynsha birinshi júldeni ıelengenimdi habarlady», deıdi sýretshi.
Halyqaralyq baıqaýdyń saltanatty marapattaý is-sharasy Ispanııanyń Kosto-Brava kýrortty aımaǵynda aldaǵy jyldyń naýryz-sáýir aıynda ótedi. Atyraýlyq sýretshi atalǵan is-sharaǵa shaqyrtý aldy.
Qazir onyń jeke qorynda 50-den asa tarıhı kartına bar. Tarıhı shyǵarmalardy oqyǵandy, ult zııalylary men batyrlarynyń, Alash arystarynyń ómirin, eńbegin zerttegendi unatady. Eske sala ketelik, budan buryn atyraýlyq dızaıner Londonda halyqaralyq baıqaýdyń birinshi júldesin ıelengendi.
Byltyr «Munar kún» kartınasy London qalasynda ótken «Altyn talanttar ýaqyty» halyqaralyq baıqaýynyń birinshi júldesin ıelendi. Bul baıqaý 2007 jyldan beri turaqty ótedi.