Oblystyń aýyldyq jerlerindegi eski mektepterdiń máselesi birtindep sheshilip keledi. Bıyl birneshe eldi mekende jańadan bilim berý uıymdary salynyp, sonyń biri jýyqta alystaǵy Qarajar aýylynda ashyldy.
Qarajar – oblys ortalyǵynan 240 shaqyrym jerde, Myrzashoqy taý-shańǵy keshenine jaqyn oryn tepken, 300-den asa turǵyny bar eldi meken. Respýblıkalyq joldyń boıynda ornalasqandyqtan, aýyldyń bolashaǵy zor dep sanalady. Munda keıingi jyldary jergilikti eski mekteptiń máselesi jıi kóterilip, aqyry ol «ERG» kompanııalar toby men Pavlodar oblysy ákimdigi arasynda jasalǵan áleýmettik mańyzdy jobalardy júzege asyrýdaǵy ózara áriptestik týraly memorandým aıasynda sheshimin tapty. Osylaısha, demeýshiler qarajatyna aýylǵa 100 oryndyq zamanaýı mektep salyndy. Keregesi keńeıgen bilim berý uıymynyń ózi endi negizgi mektepten orta bilim berý júıesine aýystyrylady dep kútilip otyr.
Jańa nysannyń ashylýyna Oqý-aǵartý mınıstri Ǵanı Beısembaev, Pavlodar oblysynyń ákimi Asaıyn Baıhanov, jergilikti aýyl turǵyndary men mektep oqýshylary qatysty.
«Qarajar aýylyndaǵy buǵan deıingi eski mektep apattyq dep tanylǵan soń, jańa ǵımarat salýǵa sheshim qabyldandy. Nátıjesinde, qysqa ǵana merzimde osyndaı bilim shańyraǵy boı kóterip, oqýshylarǵa esigin aıqara ashty. Bala minez-qulqynyń negizi mektepte qalyptasatyny belgili. Sondyqtan ustazdar men ata-analarǵa elimizdiń bolashaq mádenıetti, bilikti, eńbekqor patrıottaryn tárbıeleý jolynda sáttilik tileımin», dedi A.Baıhanov.
Ǵanı Beısembaev memlekettiń pedagog mártebesin kóterý, ınfraqurylymdy damytý, jaıly ári qaýipsiz jaǵdaı jasaý boıynsha barlyq mindettemeni oryndap jatqanyn atap ótti. «1 qazanǵa deıin elimizde 78 500 oryndyq 77 jańa mektep ashyldy. Atalǵan kórsetkishti 132 myń orynǵa deıin jetkizýdi josparlap otyrmyz. Bul 12 apatty jáne 29 úsh aýysymdy mekteptiń máselesin, sondaı-aq 113 eldi mekendegi oqýshy oryndarynyń tapshylyǵyn sheshýge múmkindik beredi. «Jaıly mektep» ulttyq jobasy aıasynda aldaǵy úsh jylda 740 myń oryndyq 369 mekteptiń qurylysyn bastaý josparlanyp otyr. Bul máseleni sheshýde bıznes ókilderiniń de shette qalmaǵany qýantady», dedi ol.
Jańa mekteptiń qurylysyna 650 mln teńge jumsaldy. Munda oqý kabınetteri, sheberhanalar, sportzal, májilis zaly, shaǵyn ortalyq, ashana, IT-synyptar, ashyq oıyn alańy qarastyrylǵan. Qazirgi kúni Qarajar mektebinde 72 bala bilim alyp jatyr. Turǵyndar zamanaýı ǵımarat aldaǵy ýaqytta eldi mekenniń zııatkerlik jáne mádenı ortalyǵyna aınalady dep máz. Buǵan deıin osyndaı jańa mekteptiń biri Jelezın aýdanyna qarasty Moıseevka aýylynda da ashylǵan. Alash ardaqtysy Maǵjan Jumabaevtyń esimin ıelengen bilim shańyraǵy burynǵy apatty mekteptiń ornyna turǵyzyldy.
Bıyl Pavlodar oblysyndaǵy 54 mektepti jańartý úshin bıýdjetten 6 mlrd 465,4 mln teńge qarastyrylǵan. Buǵan aǵymdaǵy jóndeý, mektep jıhazdaryn, ashanalardy, kitaphanalardy jańartý, qaýipsizdikti qamtamasyz etý jumystary kiredi. Ǵımarattardy jańǵyrtý jumystary tolyq aıaqtaldy.
Pavlodar oblysy,
Baıanaýyl aýdany,
Qarajar aýyly