Qostanaı qalasynda ótip jatqan Qazaqstan men Reseıdiń óńiraralyq yntymaqtastyǵy forýmynyń aıasynda Aýyl sharýashylyǵy mınıstri Aıdarbek Saparov BAQ ókilderiniń saýaldaryna jaýap berdi, dep habarlaıdy Egemen.kz.
«Bul forým eki memleket arasynda jyl saıyn ótip turatyn jaqsy bir dástúrli jıyn. 2003 jyly Omby qalasynda bastalǵan yntymaqtastyq forýmyna bıyl 20 jyl tolyp otyr. Buǵan deıin Reseı men Qazaqstannyń ár túrli qalalarynda 18 márte bas qostyq. 2015 jyly Sochıda ótken 12 forýmǵa da aýyl sharýashylyǵy máseleleri arqaý bolǵan. Sondyqtan búgingi forýmnyń taqyryby asa ózekti. Búginde agroónerkásip keshenin damytý – álemniń barlyq elderi úshin asa mańyzdy mindet sanalady. Agroónerkásip kesheni Qazaqstan men Reseı ekonomıkasynyń mańyzdy baǵyttardyń biri. Al Qostanaı – eki eldiń óńiraralyq baılanysyn nyǵaıtýǵa qolaıly mańyzdy qalanyń biri. Qostanaı oblysy Reseıdiń Orynbor, Qorǵan, Chelıabi oblystarymen shektesip jatyr. Sonymen qatar egin sharýashylyǵy damyǵan iri agrarlyq óńir sanalady», dedi mınıstr.
Qostanaı forýmyna bes júzden astam adam jınaldy. Reseı jaqtan gýbernatorlar men aýyl sharýashlyǵy mamandary, sarapshylarymen on eki oblystan delegasııa keldi.
Aýyl sharýashylyǵy mınıstri Aıdarbek Saparovtyń aıtýynsha, forýmdaǵy eń ózekti másele klımat jaıy bolmaq. «Osy oblysta sońǵy bes jyl ishinde eki jyl qurǵaqshylyq boldy. Bıyl jaýyn mólsheri kóp túsip, biraz qıynshylyqtar boldy», dedi mınıstr.
Forým aıasynda Qazaqstan men Reseı arasynda óńiraralyq deńgeıdegi birqatar qujatqa qol qoıyldy.
«Búginde eki el arasyndaǵy aýylsharýashylyq ónimderi saýdasyn damytý mańyzdy. Qazaqstan men Reseıdiń ózara taýar aınalymyndaǵy aýylsharýashylyq shıkizaty men óńdelgen ónimniń úlesi 2022 jyly 3,8 AQSh dollaryn qurady. Bul elimizdegi taýar aınalymynyń 30 paıyzy ǵana», dedi mınıstr.