Kelesi jyldyń kókteminde aralas jekpe-jektegi eń beldi promoýshen – UFC-diń mereıtoılyq týrnıri ótedi dep josparlanyp otyr. Dál qazirgi kezde 300 márte uıymdastyrylǵaly otyrǵan jarysta kimderdiń óner kórsetetini anyqtalyp jatyr.
Atalǵan týrnırde eń tańdaýly ári sanaýly ǵana sportshylar kúsh synasady. Úmitkerler qatarynda bizdiń Shavqat «Nomad» Rahmonov ta bar. Árıne, 29 jastaǵy qandasymyzǵa ondaı qurmet tegin kórsetilip otyrǵan joq. Olaı deýge negiz, osy kúnge deıin 17 jekpe-jek ótkizgen Shavqat sonyń birde-bireýinde jeńilgen emes. Ol az deseńiz, qazaqtyń qaısar uly barlyq qarsylasyn merziminen buryn utty. Tarqatyp aıtsaq, óz básekeleriniń toǵyzyn – birinshi jáne altaýyn ekinshi kezeńde aıaqtady. Tájikstandyq Farıdýn Odılov (2018 jyly) pen amerıkalyq Djeff Nıl (2023 jyly) ǵana úshinshi raýndqa deıin shydady. Desek te Rahmonov sońǵy sátte olardyń da osal tusyn tapty. «Nomad» Odılovty uryp jyqsa, Nıldy qylqyndyryp tastady.
Kópshilik Shavqat Rahmonovtyń 37 jastaǵy Gılbert Bernspen kúsh synasqanyn qalaıdy. Ol da óte myqty sportshy. Rıo-de-Janeıronyń týmasy 2012 jyldan beri osy sport túrin serik etip keledi. Sol kezden beri 28 márte oktagonǵa shyǵyp, 22 ret jeńis toıyn toılady. 15 aıqasta aıqyn basymdyq tanytty. 2021 jyldyń basynda Bernstiń jartylaı orta salmaq dárejesi boıynsha chempıondyq belbeýdi ıelenýge jaqsy múmkindigi boldy. Biraq ol Las-Vegasta ótken basty básekede Kamarý Ýsmanǵa ese jiberdi. Sońǵy ret brazılııalyq faıter bıyl mamyr aıynda Belal Muhammadpen aıqasyp, odan upaı sanymen utyldy. Qazirgi kezde Gılbert UFC-diń reıtınginde tórtinshi oryndy ıelendi. Al Shavqat Ońtústik Amerıkanyń oǵylanynan bir saty tómen tur.
Sonymen qatar sportsúıer qaýym UFC 300 mereıtoılyq týrnırinde Konor Makgregor (Irlandııa) men Maıkl Chendler (AQSh), Islam Mahachev (Reseı) pen Charlz Olıveıra (Brazılııa), Dastın Pore (AQSh) men Djastın Gedjı (AQSh) jáne Hamzat Chımaev (BAÁ) pen Paýlo Kosta (Brazılııa) arasyndaǵy aıqasty kórýge aıryqsha qushtarlyq tanytyp otyr.