Osymen tórt jyl qatarynan elimizdiń úsh megapolısinde «Jumys isteıtin jastar úshin satyp alý quqyǵynsyz jalǵa beriletin turǵyn úı» baǵdarlamasy júzege asyrylyp keledi. Ol úshin jyl saıyn Astana, Almaty, Shymkent turǵyndaryna orta eseppen 1 myń jańa páterden bólinedi.
Búginde baǵdarlama sheńberinde úsh qalada 10 myńǵa jýyq úı jalǵa berilgen. Úkimet jumys isteıtin jastarǵa 2025 jylǵa deıin 12 myń baspana bólýdi josparlap otyr. Joba sharty boıynsha úsh jyl ótkennen keıin jalǵa alýshy bólingen turǵyn úıdi bosatýy kerek. Mundaǵy basty maqsat – 35-ke deıingi otandastarymyzǵa baspana satyp alý úshin alǵashqy jarna jınaýǵa qoldaý bildirý.
«Byltyrǵa deıin jastar sanatyna 29 jasqa deıingi azamattar ense, bıyldan bastap jas shegi 35 jasqa deıin uzartyldy. Aldyńǵy ýaqytta úıler 5 jylǵa berilgen edi. Qazir 3 jylǵa qysqartyldy. Olardyń mindetti túrde zeınetaqy qorynda aýdarylǵan mindettemelerimen birge resmı túrde jumysy bolýy kerek», dedi Shymkent qalasy turǵyn úı basqarmasynyń esepke alý jáne turǵyn úılerdi bólý bóliminiń basshysy Juldyzaı Ordabekova.
2023-2025 jyldary qalalardyń árqaısysynda qosymsha 3 myń jalǵa berý páterlerin satyp alý úshin jergilikti bıýdjetterden 32,3 mlrd teńge bólý josparlanypty. Elordada 770 jas pátermen qamtylady. Bir ereksheligi, baspana jaldaý baǵasy sharyqtap turǵanda, bul úılerdiń aı saıynǵy tólemi nebári 5000-15000 teńge bolady. Astanada qujattardy qabyldaý merzimi 6 qarashadan 12 qarashaǵa deıin «qatysu.zhilfond.kz» portaly arqyly elektrondy túrde júrgizildi. Al Shymkenttik jastar 8-10 qarasha aralyǵynda «kezekte.kz» portalynda elektrondy sıfrlyq qoltańbasy arqyly ótinish berdi. Bıyl óńirde jyl sońyna deıin «Turan» shaǵyn aýdanynda ornalasqan 800-den asa páterdi jalǵa berý kózdelgen. Almatyda myńǵa jýyq páter qarastyrylypty.
Joba talaby boıynsha «Jastar» baǵdarlamasyna qatysýshylarǵa qoıylatyn basty talaptar: azamattyń jasy 35-ke tolmaǵan, jumys isteıtin bolýy; orta, orta-arnaıy, joǵary, joǵary oqý ornynan keıingi bilimi bolýy jáne resmı jumys orny bolýǵa tıis; ótinish berýshiniń Astana, Almaty, Shymkent qalasynda ótinim bergenge deıin keıingi 3 jyldan kem emes turaqty tirkeýde bolýy; Astana, Almaty, Shymkent qalasynda ótinish berýshiniń otbasy múshelerin (jubaıy jáne balalary bolǵan jaǵdaıda) turaqty tirkeýi bolýy; ótinish berýshide jáne otbasynyń barlyq múshesinde Qazaqstan Respýblıkasy boıynsha menshik quqyǵyndaǵy turǵyn úıdiń, sondaı-aq ótinim bergen kezde keıingi 5 jyl ishinde satyp alý quqyǵymen jalǵa beriletin turǵyn úıdiń bolmaýy; tólem qabiletin rastaý (sońǵy 6 aıda ótinish berýshide aı saıynǵy tabysy keminde 40 AEK nemese 138 000 teńge bolýy kerek).