Qazaq tennısshisi Beıbit Juqaev AQSh-tyń Shampeın qalasynda ótip jatqan «Chellendjer» týrnıriniń úshinshi aınalymyna shyǵa almady.
Osydan on kún buryn Sharlotsvıldegi týrnırde top jaryp, álemdik reıtıngte birden 52 satyǵa joǵarylaǵan qandasymyz bul jarysty sátti bastaǵan edi. Tusaýkeser kezdesýinde ol ıtalııalyq Enrıko Dalla Valleni 6:1, 6:1 esebimen oısyrata utty. Biraq ekinshi kezeńde B.Juqaevtyń joly bolmady. Beıbit ATR reıtınginde ózinen 118 saty tómen turǵan Horvatııanyń ókili Nıno Serdarýshıchke ese jiberdi. Alǵashqy set taı-breıkke deıin ulassa, ekinshisinde qarsylasynyń mysy basym boldy – 6:7, 4:6. Endi qazaq tennısshisi Amerıka qurlyǵynda ótetin taǵy bir týrnırge qatysýdy josparlap otyr.
Qazaqstannyń besinshi raketkasy Denıs Evseev Shvesııanyń Danderıýd qalasynda shymyldyǵy túrilgen jarystyń alǵashqy kezeńinde jergilikti oıynshy Karl Frıbergti súrindirdi – 6:2, 6:3. Ekinshi aınalymda ol japonııalyq Brendon Nakashımomen baq synasady.