Shahmattyń rapıd pen blıs túrlerinen erler men áıelder arasyndaǵy kezekti álem chempıonaty 26-30 jeltoqsan aralyǵynda О́zbekstannyń Samarqan qalasynda ótedi.
Bul habardy Halyqaralyq shahmat federasııasy (FIDE) taratty. Byltyr dál osy jarys Almatyda uıymdastyrylǵan edi. Balýan Sholaq atyndaǵy sport saraıynda uıymdastyrylǵan baıraqty básekede 2013-2023 jyldar aralyǵynda tórtkúl dúnıeniń teńdessizi dep tanylǵan shvesııalyq Magnýs Karlsenniń qarqynyna eshkim shydamady. Ol shahmattyń eki túrinen de bas júldeni oljalady. Áıelder saıysy Bıbisara Asýbaeva (blıs) men qytaılyq Tan Chjýnıdiń (rapıd) jeńisimen aıaqtaldy. Osylaısha, qazaq qyzy blısten álemniń eki dúrkin chempıony atandy. Al Dınara Sádýaqasova (rapıd) kúmis medaldy moınyna ildi.
«FIDE músheleri О́zbekstanda shahmat óte jaqsy qarqynmen damyp kele jatqanyna san márte kóz jetkizdi. Ony tolyqtaı moıyndaımyz. Sol sebepti de biz sol elge atalǵan jarysty ótkizýdi senip tapsyryp otyrmyz. Olardyń osy dúbirli dodany asa joǵary deńgeıde uıymdastyratynyna qylaýdaı da kúmánimiz joq», deıdi FIDE prezıdenti Arkadıı Dvorkovıch.