Belgili qalamger, Halyq jazýshysy Beksultan Nurjekeevke «Jetisý oblysynyń Qurmetti azamaty» ataǵy berildi. Qurmetti marapatty Taldyqorǵan tórinde óńir basshysy Beıbit Isabaev tapsyrdy.
Oblys ákimi jazýshynyń shyǵarmalaryn birneshe býyn oqyp óskenin, sonyń ishinde ózi de bala kúninen qalamgerdi týyndylary arqyly tanyǵanyn atap ótti.
«Keńestik kezeńniń qatań súzgisi bar kezdiń ózinde sizdiń shyǵarmalaryńyzdyń shyndyqty aıta biletin minezi boldy. Budan bólek, tarıhı týyndylaryńyz bir tóbe. Sizdi az jazsa da, saz jazatyn, memlekettik, qoǵamdyq deńgeıdegi iri máselelerge kesek pikir aıta biletin qaıratker retinde qurmetteımiz», degen B.Isabaev jazýshynyń shyǵarmashylyq eńbegine tabys tilep, arnaıy ataqtyń lentasyn, tósbelgisi men qujatyn resmı túrde tabystady.
О́z kezeginde Beksultan Nurjekeev rızashylyq tilegin bildirip, «Týǵan jerimniń bul syıy – maǵan bárinen qymbat. Jetisýdyń men úshin orny bólek. Jáne osy otyrǵan árqaısysylaryńyz úshin de solaı bolýǵa tıis. Prezıdent ádiletti qoǵam qurý, adal azamat bolý týraly aıtty. Sol ustanymdy árqaısysymyz ózimizden bastaýymyz kerek. Búgingi maǵan kórsetip otyrǵan qurmetterińizge rızashylyǵymdy bildiremin», dedi.
Aıta keteıik, Beksultan Nurjekeev Jetisý oblysy Panfılov aýdany Aqjazyq aýylynda týǵan. Ol «Kútýmen keshken ǵumyr», «Erli-zaıyptylar», «Jaý jaǵadan alǵanda», «Áı, dúnıe-aı» sııaqty birqatar prozalyq kitaptyń avtory.
Jetisý oblysy