Memleket basshysy Qasym-Jomart Toqaev Joldaýda mektepke deıingi tárbıe jumysyna mán berip, balabaqshamen qamtamasyz etý máselesin tolyqqandy sheshýdi tapsyrǵan edi. Búginde atalǵan tapsyrma aıasynda Jetisýda júıeli jumystar júrip jatyr. Máselen, jýyrda oblys ortalyǵynda №6 balabaqsha iske qosyldy. Artynsha Sarqan aýdanynda mektep ashylyp, baldyrǵandar máre-sáre boldy.
Áýelgi ómirlik tanymdar balabaqshadan bastalady. Oblysta qazirgi ýaqytta mektepke deıingi bilim berý uıymdary jemisti jumys istep tur. Buryn jabylǵan balabaqshalar qaıta ashylyp, jańadan salynǵandary iske qosylyp, baldyrǵandardyń mektepke deıingi bilim alýyna septigin tıgizip jatyr. Sondaı ıgilikti is Taldyqorǵan tórinde oryn aldy. Qaladaǵy №6 balabaqshanyń ǵımaraty kúrdeli jóndeýden ótip, esigin aıqara ashty. Toqyraý kezinde oblystyq arhıv ornalasyp, keıinnen bos qalǵan eki blok baldyrǵandarǵa berildi.
– Balabaqsha – kishkentaı bóbekterimizdiń bilim saparyna bastaıtyn alǵashqy qadamy. Jańa ǵımarat zamanǵa saı barlyq jabdyqpen qamtylǵan. Mańaıdaǵy ata-analar endi alysqa sabylmaı, jańa nysanǵa ákeledi, – dedi oblystyq bilim basqarmasynyń basshysy Marat Súleımenov.
Jóndeý jumystaryn «Nur shapaǵat» qurylys kompanııasy jergilikti bıýdjet qarjysyna júrgizgen. Ǵımarat 4 blokten turady. Búginde 270 balaǵa arnalǵan 11 top jumysyn bastady. Bir bóbekjaı toby ashylyp, mekemeniń ataýy ózgerdi. Kadr máselesi de sheshilip, jumysqa konkýrs arqyly 20 pedagog-maman, 21 kishi qyzmetker tartyldy. Sonymen qatar balabaqshanyń materıaldyq bazasy jaqsartylǵan.
Aıta keteıik, bıyl oblysta jalpy oryn sany 2 260-ty quraıtyn mektepke deıingi uıymdar ashyldy. Onyń ishinde 755 oryndyq 10 jekemenshik balabaqsha, aýdandar boıynsha 1 505 oryndyq qosymsha top jumys istep jatyr. Sonyń ishinde Taldyqorǵan qalasyndaǵy «Ersultan», «Montessorı», «Samıla», Panfılov aýdanyndaǵy «Daryndy sábı», Kerbulaq aýdanyndaǵy «Mıras» balabaqshalaryn atap ótýge bolady. Oǵan qosa Sarqan aýdanynda – 75, Eskeldi aýdanynda 76 oryndyq qosymsha top ashylǵan.
Sondaı-aq Memleket basshysy 2025 jylǵa deıin elimizde 1 myń mektep salý mindetin júktegen edi. Bul baǵytta elimizde ıgi qadamdar jasalyp jatyr. Osy qatarda Sarqan aýdanyndaǵy jańadan paıdalanýǵa berilgen Birlik orta mektebin atap ótýimiz kerek. Birlik aýylyndaǵy orta mektep yńǵaılastyrylǵan úıde ornalasqandyqtan, oqý úrdisin jetildirýge, jyldar boıy oqýshylarǵa sapaly bilim berýge jan-jaqty múmkindik bolmaǵany belgili. Mine, bıyl kópshiliktiń kútken úmiti jandy. Jurtshylyq tilegi eskerilip, Birlik orta mektebiniń jańa ǵımaraty paıdalanýǵa berildi. Mektepti «Qurylysshy-TBS» jaýapkershiligi shekteýli seriktestigi júrgizip, aýqymdy qurylysqa bólingen 1 mlrd 300 mln teńge tolyq ıgerildi. Qarashanyń 14-i jańa mektep resmı túrde ashylyp, aýyl turǵyndary qýanysh kózaıymy boldy.
Saltanatty is-sharada Sarqan aýdanynyń ákimi Ǵalymjan Mamanbaev bolashaqqa qadam basqan shákirtterdiń ata-anasyn qýantyp, jańa mektepte tek qana jaqsy úlgerimge jetetinine, mektep túlekteriniń el úmitin aqtaıtynyna senim bildirdi. Oblystyq bilim basqarmasy basshysynyń orynbasary Gúlmıra Ahmetova, ata-analar komıtetiniń tóraıymy Gúlshat Túmenbaeva, Birlik orta mektebiniń ardager ustazy Shara Dútbaeva ujymǵa sáttilik tilese, Sarqan aýdanynyń qurmetti azamaty Tileýles Dosanamanov aq batasyn berdi. Jańa mekteptiń lentasy qıylyp, jurtshylyq bilim negizin qalaıtyn altyn uıany aralap, zamanaýı kabınettermen tanysty.
Jetisý oblysy