Árbir aýyldyń turǵyndaryna hat-habar, gazet-jýrnaldardy keshiktirmeı jetkizip kelgen «Qazposhta» jumysyna búginde aıtylar syn az emes. Sol synnan qorytyndy shyǵarý maqsatynda atqarylyp jatqan jumystar da barshylyq jáne kópshilik poshtashylardyń básekege qabiletti mekeme retinde sapaly qyzmet kórsetýinen úmitti.
«Qazposhta» AQ Túrkistan oblystyq fılıal dırektory Azat Ilıasovtiń aıtýynsha, geografııalyq enýdiń eń joǵary deńgeıine ıe mekemede 1 155-ten asa qyzmetker jumys isteıdi. О́ńirde 14 aýdandyq poshta baılanys toraby – 306, onyń ishinde 237 aýyldyq, 59 qalalyq bólimshe, 10 seriktestik núkte bar. Sondaı-aq barlyq bólimshede poshtalyq, logıstıkalyq, qarjylyq, agenttik, elektrondyq qyzmetter usynylady. Ár aýdan, aýyl turǵyny ózine qajetti taýardy jaqyn «Qazposhta» bólimshesinen, sálemdemeler sýpermarketinen nemese «Esikten esikke» kýrer arqyly mekenjaıyna jetkizip berý qyzmet túrin paıdalana alady.
«Bıyl 8 aıdyń qorytyndysynda «Qazposhta» AQ-tyń elektrondy kommersııany jáne qarjylyq qyzmetterdi damytýy esebinen, sonymen qatar shyǵyndardy ońtaılandyrýdyń nátıjesinde tabysty mekemege aınalyp, byltyrǵy men salystyrǵanda 44 paıyzǵa nemese 16,7 mlrd teńgege artty. «Qazposhta» óz fýlfılment ortalyqtaryn damytyp, otandyq jáne sheteldik tanymal marketpleıster úshin tapsyrystar berý beketterin ashyp, qoımalar men poshtamat jelilerin keńeıtý jumystaryn júrgizip jatyr. Sol jobalardyń biri – sheteldik tanymal marketpleısterden klıentterimizdiń tapsyrystaryn berýge qolaıly bolý úshin 2023 jyldyń 1 qarashasynda Qazpost Keruen jańa servısimiz iske qosyldy. Amerıkalyq jáne eýropalyq tanymal onlaın dúkender elimizge óz taýarlaryn jetkizip bere almaıdy, sol sebepti bul qyzmetti qosý qolǵa alyndy. Sebebi halyqtyń basym bóligi Qytaı, AQSh, Eýropadan keletin taýarlaryna kóp suranys jasaıdy. Sondyqtan «Qazposhta» osy suranystardy eskere otyryp, tapsyrystardy resimdeýdiń yńǵaılylyǵymen, qoljetimdi baǵada taýarlardyń elimizdiń kez kelgen núktesine tez jetkizýin ári jóneltýin júzege asyrady. Bıyl qyzmetkerlerimizge 30 jyldyq mereıtoı aıasynda tuńǵysh ret Prezıdent Qasym-Jomart Toqaevtyń atynan memlekettik nagradalar tabys etildi. Onyń ishinde Tólebı aýdandyq poshta baılanys torabynda 41 jyl boıy adal eńbek etip kele jatqan Zabaıra Ultanbaeva «Qurmet» ordenimen marapattaldy. Sonymen qatar Shardara aýdany poshta baılanys torabynda 42 jyl qyzmet atqaryp kelgen poshta baılanys toraby bastyǵynyń orynbasary Aısha Akımbekova Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsınniń qolynan «Eńbek ardageri» medalin aldy. Birqatar qyzmetkerimiz poshta salasynyń áleýmettik-ekonomıkalyq damýyna qosqan eleýli úlesi úshin oblys ákiminiń Alǵyshaty jáne gramotasymen marapattaldy», deıdi A.Ilıasov.
«Qazposhta» halyqqa sapaly qyzmetti kórsetý úshin brondalǵan avtotehnıkalaryn alyp, ınfraqurylymdardy qalpyna keltirgen. Mýltımodaldy qoımalarmen logıstıkalyq jáne saýda habyn salýǵa óńirlerde oblys ákimdiginiń qoldaýymen jer ýchaskesi bólinip, memorandýmǵa qol qoıylǵan. Sondaı-aq «Qazposhta» memlekettik-áleýmettik qyzmetter kórsetý úshin aýyldyq poshta bólimshelerin kópfýnksıonaldy qyzmet kórsetý ortalyqtaryna aınaldyrmaq. Iаǵnı tıisti mınıstrliktiń qoldaýymen «Azamattarǵa arnalǵan úkimet» memlekettik korporasııasynyń qyzmet túrin aýyl turǵyndary poshta bólimshelerinen alady.
Túrkistan oblysy