Almaty qalasy Naýryzbaı aýdanyndaǵy №7 qalalyq klınıkalyq aýrýhananyń aldyna qoıylǵan aıaldama keshenine qatysty ýrbanıst Dıdar Shajalıev pikir bildirdi, dep habarlaıdy Egemen.kz.
Qala ákiminiń baspasóz qyzmetiniń málimetinshe aıaldamanyń shatyry alıýmınıımen jabylǵan, metall jaqtaý aǵashpen qaptalǵan. Barlyq aǵash elementter otqa tózimdi, sý ótkizbeıtin jáne arnaıy quraldarmen óńdelgen. Uzyndyǵy 18 metr oryndyq qoıylǵan. Sarapshynyń sózinshe, jańa aıaldamanyń basty artyqshylyǵynyń biri - syıymdylyq. «Mundaı aıaldama týraly senimdi túrde «adamdar úshin jasalǵan» dep aıtýǵa bolady. Iаǵnı, qandaı da bir standartty joba ǵana emes, azamattardyń qajettilikteri eskerilgen. Kez kelgen aýa raıynda munda kóptegen adamdar jaıly ornalasa alady», dedi Dıdar Shajalıev. Aıaldamany jóndeý aýdannyń aıaldama keshenderin ustaýǵa bólingen qarajat esebinen júrgizildi.
Taǵy bir aıta keter aqparat, jolaýshylar aǵynyn saraptaý nátıjesinde Almaty metropolıteninde jyljymaly quram sany kóbeıtildi. Endi qarbalas ýaqytta 11 quram 5 mınýt 38 sekýnd jıilikpen qyzmet kórsetedi. Oqý jyly bastalǵannan jolaýshylar aǵyny 70 myńnan 90 myńǵa deıin kóbeıgen. Taldaý nátıjesinde jelige qosymsha quram shyǵarý týraly sheshim qabyldanǵan. Ár quram jalpy syıymdylyǵy 900 adamnan asatyn 4 vagonnan turady. Eske salaıyq, Almaty metropolıteni 2011 jylǵy 1 jeltoqsanda iske qosylǵan, qazirgi kezde 11 stansııa bar. Ári qaraı 4 stansııanyń qurylysy boıynsha jumystar júrgizilip jatyr.