Premer-mınıstr Álıhan Smaıylovtyń Qazaqstan mashına jasaýshylar odaǵynyń basqarma tóraǵasy Meıram Pishembaevpen kezdesýinde salany damytýdyń 2024-2028 jyldarǵa arnalǵan Keshendi josparyn júzege asyrýdyń negizgi baǵyttary talqylandy. Úkimet basshysy saladaǵy óndiristiń ósý qarqynyna oń baǵa bere otyryp, qabyldanǵan qujattyń mańyzdylyǵyn atap ótti, aıtýynsha, Keshendi jospardy júzege asyrý mashına jasaý salasyn ǵana emes, tutastaı alǵanda elimizdiń óńdeýshi ónerkásibin damytýǵa yqpal etedi, dep jazady Egemen.kz Úkimettiń baspasóz qyzmetine silteme jasap.
Keshendi jospar 7 baǵyt boıynsha 79 is-sharadan turady. Jospardyń oryndalýy 2028 jylǵa qaraı JQQ-nyń (jalpy qosylǵan qun) 4,5 ese, NKI-diń (naqty kólem ındeksi) 2,2 ese, eksport kóleminiń 3 ese, ınvestısııa kóleminiń 1,5 esege ósimin qamtamasyz etedi.
«Keshendi jospardy júzege asyrý búgingi tańdaǵy basymdyǵymyz jáne mindetimiz. Belgilengen nysanaly ındıkatorlardyń sapaly oryndalýyn qamtamasyz etý jáne otandyq mashına jasaý salasyn odan ári jańǵyrtý úshin bar kúsh-jigerimizdi salamyz», dedi Qazaqstan mashına jasaýshylar odaǵynyń basshysy.
Mashına jasaý 37 tarmaqty qamtıtyn jáne ekonomıkanyń barlyq derlik salalaryn jabdyqtarmen qamtamasyz etetin eń joǵary tehnologııaly sala ekenin aıta ketken jón. Saladaǵy bir jumys orny shektes salalarda 8-10 jumys ornynyń paıda bolýyna alyp keledi.
Eske salaıyq, Memleket basshysy bıylǵy Joldaýynda mashına jasaý ındýstrııalyq ósýdiń draıveri bolyp tabylatyn óńdeýshi ónerkásipti údemeli damytýdy basty mindetterdiń biri retinde belgilegen bolatyn. Mashına jasaý salasyn odan ári jańǵyrtý el ekonomıkasyn ártaraptandyrý men ındýstrııalandyrýǵa jańa serpin beredi.