Prezıdentke Aqtóbe oblysynda «Aýyl amanaty» baǵdarlamasynyń iske asyrylý barysy jóninde baıandaldy, dep habarlaıdy Egemen.kz Aqordanyń baspasóz qyzmetine silteme jasap.
Atalǵan bastama qolǵa alynǵaly beri óńir boıynsha 1471 jobaǵa 6,6 mıllıard teńge kóleminde nesıe berilgen. Sondaı-aq bıyl qyrkúıek aıynda qosymsha 12,5 mıllıard teńge qarjy bólingen.
Memleket basshysyna baǵdarlama aıasynda aımaqtaǵy 209,8 gektar alqapqa kókónis jáne baqsha daqyldary egilip, jalpy aýmaǵy 1 gektardan asatyn 77 shaǵyn jylyjaı salynǵany týraly aıtyldy. Sonymen qatar 101 kondıterlik seh pen naýbaıhana, 129 shaǵyn sút óńdeý, 65 et óńdeý jobasy iske qosylǵan.
Budan bólek, Aqtóbe oblysynda 1210 jańa jumys orny ashylyp, 1062 adam jeke kásipker retinde tirkelgen. Bir ǵana Mártók aýdanynyń ózinde atalǵan baǵdarlama sheńberinde usynylǵan 195 jobaǵa 902,5 mıllıon teńge nesıe berilgen.