Tótenshe jaǵdaıda kórsetken tabandy is-qımyly úshin Qorǵanys mınıstri, general-polkovnık Rýslan Jaqsylyqov aǵa serjant Meırambek Ysqaqovty «El qorǵany» medalimen marapattady. Otan qorǵaýshynyń batyl áreketi joǵary basshylyqtan laıyqty baǵasyn aldy.
Ol órtenip jatqan kólikten adamdy qutqaryp qalǵan. 68665 áskerı bóliminde vzvod serjanty – jaýyngerlik jáne deneshynyqtyrý daıyndyǵynyń nusqaýshysy Meırambek Ysqaqovty marapattaý is-sharasyna bólim basshylyǵy men jeke quramy qatysty. Qorǵanys mınıstriniń atynan áskerı qyzmetshige vedomstvolyq nagradany Qurlyq áskerleriniń bas qolbasshysy, general-maıor Asan Júsipov tabys etti.
«Áriptesimizdiń is-áreketi pogon taqqan adamdardyń boryshty asqan abyroımen oryndaýymen erekshelenetinin jáne adamdardy qutqarý kezinde ózin qurban etýge daıyn ekenin kórsetti. Biz búgin qıyn sátte batyldyq tanytqan batyrymyzǵa qurmet kórsetýdemiz. Otanyna laıyqty, batyl ul tárbıelegen ata-anasyna myń alǵys aıtamyz», dedi ol.
Aıta ketsek, 3 jeltoqsan kúni keshke aǵa serjant Meırambek Ysqaqov úıdiń janyndaǵy turaqta janyp jatqan kólikti kóredi. Áskerı qyzmetshi oqıǵa týraly Astana qalasy Tótenshe jaǵdaılar departamentiniń 101 ortalyǵyna tez arada habarlaǵan. Kólikke júgire jetken ol salonda qoıý tútinge tunshyǵyp, esinen tanyp qalǵan júrgizýshi bar ekenin baıqaǵan. Esikti ashqan Meırambek zardap shekken adamdy janyp jatqan kólikten shyǵaryp, oǵan alǵashqy medısınalyq kómek kórsetken.
Oqıǵa kýágerleri jedel járdem shaqyryp, zardap shekken adam №1 qalalyq aýrýhanaǵa jatqyzyldy. Áskerı qyzmetkerdiń shuǵyl áreketi qaıǵyly oqıǵanyń aldyn alýǵa yqpal etti.