Úkimet pen ArcelorMittal korporasııasy «ArselorMıttal Temirtaý» AQ-ny Qazaqstanǵa berý týraly mámilege keldi. Muny О́nerkásip jáne qurylys mınıstri Qanat Sharlapaev málim etti, dep habarlaıdy Egemen.kz Úkimettiń baspasóz qyzmetine silteme jasap.
Tamyz aıynda Prezıdent Qasym-Jomart Toqaev «ArselorMıttal Temirtaý» AQ-da oryn alǵan apat kezinde kompanııanyń ınvestısııalyq jáne ózge de mindettemelerin óreskel buzǵanyn synǵa aldy. Memleket basshysy AMT-men ınvestısııalyq yntymaqtastyqty toqtatý jóninde tapsyrma bergen bolatyn. El Úkimeti «ArselorMıttal Temirtaý» ıelerimen ArcelorMittal kompanııasyn metallýrgııalyq kombınat quramynan shyǵarý múmkindigi týraly kelissózder júrgizdi. Kelissózder 2022 jyldyń 3 qarashasynda AMT-nyń enshiles kásiporny – Lenın atyndaǵy shahtada bolǵan qaıǵyly apattan keıin bastalyp, Úkimet «ArselorMıttal Temirtaý» kompanııasyna naqty talaptar qoıdy. Kelissózder nátıjesinde 2022 jylǵy 9 jeltoqsanda Qazaqstan Úkimeti men ArcelorMittal arasynda Qazaqstan tarapyna kásiporyndy baǵalaý jáne aýdıt júrgizýge múmkindik beretin «Standstill Agreement» kelisimine qol qoıyldy.
Mınıstr kelissózder barysynda ArcelorMittal $3,5 mlrd suraǵanyn, bul halyqaralyq konsýltanttardyń esebine sáıkes kelmeıtinin aıtty. «Bul kelissózder úderisiniń uzaqqa sozylýynyń basty sebepteriniń biri boldy. Bizdiń maqsatymyz – qymbat jáne uzaqqa sozylatyn halyqaralyq sot prosesterine jol bermeı, kombınatty ádil baǵamen satyp alý boldy. Kásiporynnyń toqtap qalmaýy úshin kelissózderdi jedel ári jyldam júrgizýdiń qajettiligi týyndady», dedi Qanat Sharlapaev. 11 raýndtan turǵan kelisim oń nátıje berdi. «Qazaqstan Úkimeti men «ArselorMıttal» arasyndaǵy kelisimdi mega-mámile dep ataýǵa bolady, onyń elimiz úshin mańyzy erekshe. Biz basqa elderdiń úkimetteri tap bolatyn kóptegen táýekelderdi aınalyp óte aldyq», dedi mınıstr.
Ol sondaı-aq jasalǵan mámileniń úsh negizgi elementin jarııalady: Q.Sharlapaev kelisimniń birneshe tıimdiligin atady. Atap aıtqanda, Memleket aktıvter qunyn $3,5 mlrd-tan $286 mln-ǵa deıin tómendetti. Mámileni júzege asyrýǵa memlekettik bıýdjetten eshqandaı qarajat jumsalǵan joq. Jańa ınvestor ArcelorMittal bas kompanııasynyń aldynda 4 jyl ishinde $250 mln somasyndaǵy qysqa merzimdi nesıeni jáne $450 mln uzaq merzimdi nesıeni óteý boıynsha mindetteme alatyn boldy.
«$286 mln – bul tolyq jumys istep turǵan eki kásiporynnyń quny ekenin erekshe atap ótkim keledi. Sonymen qatar ArcelorMittal Qazaqstan Úkimetine eshqandaı talap qoımaıdy. Kelisim halyqaralyq quqyq normalaryn tolyq saqtaı otyryp, quqyqtyq negizde jasaldy», dedi Qanat Sharlapaev.
Budan bólek kelissóz barysynda ArcelorMittal kompanııasy «Qazaqstan halqyna» qaıyrymdylyq qoryna 16 mıllıard teńge jarna aýdaratyn boldy. Bul qarjy Qaraǵandy oblysy turǵyndarynyń ózekti máselelerin sheshýge jáne áleýmettik mańyzy bar jobalardy júzege asyrýǵa jumsalady. Sondaı-aq bul somanyń 50%-y Temirtaý qalasyna bólinbek.