Qostanaı oblysy Tótenshe jaǵdaılar departamentiniń basshysy Qaırat Qasym Qostanaıdaǵy Amangeldi turǵyn alabynda qulaǵan ǵımarattyń jaı-japsaryn aıtyp berdi. Onyń aıtýynsha, úıindi astynda taǵy úsh adamǵa deıin bolýy múmkin, dep habarlaıdy Egemen.kz.
«Kamaz ortalyǵynyń aýmaǵynda gaz-aýa qospasynyń jarylǵany týraly habarlama tústi. Ǵımarat qulady. Saǵat 15:00-de úıindi astynan úsh adamdy alyp shyqtyq. Olardyń biriniń jaǵdaıy aýyr. Aldyn ala málimet boıynsha, 12 adam zardap shegip, olarǵa medısınalyq kómek kórsetilgen. Ekeýi úılerine jiberildi, qalǵandary áli aýrýhanada. Jumys berýshilerdiń tizimi boıynsha úıindi astynda úsh adamǵa deıin bolýy múmkin, biraq bul uıymǵa qatysy joq taǵy qansha adam bar ekeni belgisiz. Iаǵnı, bul klıentter bolýy múmkin. Sondyqtan qazir jumys júrgizilip jatyr. Kompanııanyń qandaı qyzmet kórsetkenin naqty aıta almaımyn», dedi jýrnalısterge Qostanaı oblysy Tótenshe jaǵdaılar departamentiniń basshysy Qaırat Qasym.
Onyń aıtýynsha, qurylys jumystary men zaqymdanǵan tehnıkalardyń qaldyqtary izdeý jumysyn qıyndatyp tur.
«Biraq qajetti qural-jabdyqtardy ákeldik. Biz qorqatyn jalǵyz másele - úıindi astynda qalǵandarǵa zııan keltirmeý», dep qosty Qaırat Qasym.
Esterińizge sala keteıik, búgin saǵat shamamen 12:36-da Qostanaı qalasyndaǵy Amangeldi eldi mekeninde gaz jarylyp, bir qabatty ǵımarattyń tóbesi opyrylyp jerge túsip qaldy.