«Qazaq stıliniń» juldyzdy sáti alda

BAQ ókilerine bergen suh­battary nemese áleýmettik je­liler arqyly kópshilik aldyna shyqqanda «Qazaq Style» degen janama esimdi tańdaǵan Jánibek únemi qandaı dúleı kúsh ıesi bolsa da, janyn salyp judyryqtasýǵa ár kez daıar ekenin aıtýdan jalyqpaıdy. Ol dańqy dúrkirep turǵan dúldúlderdiń birazyn jekpe-jekke shaqyrdy. Shyny kerek, qazaqtyń qaısar ulymen betpe-bet kelýge qaımyǵa ma, álde basqa da sebepteri de bar ma, áıteýir beldi boksshylar Álimhanulynyń bul usynysyna qulaq asar emes. Desek te jýyrda ǵana AQSh-tyń gúrzi judyryqty jigiti Djermall Charlo orta salmaqqa qaıta oralyp, álem chempıonymen kezdesýge «ket ári» emes ekenin málimdedi. Al sol boksshy jaıynda biz ne bilemiz?

Djermall Charlo 1990 jyl­dyń 19 mamyrynda AQSh-tyń Tehas shtatyndaǵy Rıchmond qalasynda dúnıege keldi. Janama esimi – «Temir adam». Egizi Djermellamen birge ol sporttyq mansabyn áýelde áýesqoı boks­tan bastady. Ekeýi de AQSh qu­ramasy sapynda birqatar halyq­aralyq jarystarda tabysty óner kórsetip, bolashaǵynan zor úmit kúttiretin bylǵary qolǵap sheberleri retinde tanyldy. Desek te, olardyń ańsary kásip­qoı rıngke aýdy. Bul rette de aǵaıyndylar tolymdy ta­bystarǵa qol jetkizdi.

Jánibekpen jekpe-jekke shyǵýǵa kelisimin bergen Djer­mall kásipqoılar arasyndaǵy óziniń tusaýkeser kezdesýin 2008 jyldyń qyrkúıek aıynda ótkizdi. Sol kezden beri 33 márte sharshy alańǵa shyǵyp, barlyq qarsylasynan basym tústi. 22 básekelesin nokaýtqa jiberdi. 2015 jyly IBF nusqasynyń birinshi orta salmaqtaǵy jáne 2018 jyly WBC nusqasynyń orta salmaqtaǵy chempıondyq belbeýin ıelendi. О́zine tıesili sol ataqtardy ol birneshe ret sátti qorǵady. Charlo kezinde Kornelıýs Bandreıdj, Ostın Traýt, Djýlıan Ýılıams, Horhe Heıland, Matveı Korobov, Brendon Adams, Dennıs Hogan, Sergeı Derevıanchenko jáne Hýan Masıas Montıel syndy sańlaqtardy sabady.

Eki jyldan asa ýaqytqa so­zylǵan úzilisten keıin Djer­mall Charlo sharshy alańǵa qaıta oralyp, ústimizdegi jyldyń 25 qarashasynda Las-Vegasta óziniń otandasy Hose Benavıdesti upaı sanymen utty. Barlyq úsh tóreshi «Temir adamnyń» myqtylyǵyn biraýyzdan moıyndady. Bul jaǵdaı Djermalldyń áli de babynda ekenin ańǵartsa kerek.

Qazirgi kezde Jánibek Álim­hanulynyń orta salmaqta WBO men IBF nusqalary boıyn­sha álem chempıony ekenin jo­ǵaryda aıttyq. WBC-tyń altyn belbeýi Djermall Char­loda. Eger osy jekpe-jek jýyq arada ótetin bolsa, on­da jeńiske jetken boksshy bir­den úsh birdeı chempıondyq ataqty ıelenedi. Osy oraıda biz Jánibekke zor senim artyp otyrmyz. Qandasymyz qar­sylasyn qapy qaldyrýǵa tıis. Onda onyń jolynda tek Erıslandı Lara ǵana qalady. Qazirgi kezde Kýbanyń qabylany WBA-nyń teńdessizi dep tanylyp otyr. Biraq ony da utýǵa bolady. Kezinde bul boksshynyń Baqyt Sársekbaevtan eki ret taıaq jegeni jankúıerlerdiń esinde. Iаǵnı Lara qazaqtardyń judyryǵy joıqyn ekenin jaq­sy biledi. Olaı bolsa, Jánibek Álimhanulyna aq jol tileıik. Alashtyń bir azamaty bekzada óner – bokstan álemniń ab­solıýtti chempıony atanyp jat­sa, bizder úshin bul úlken már­tebe bolar edi.