Qasym-Jomart Toqaev Ilham Álıevti eliniń aıtýly jetistikke qol jetkizýimen, atap aıtqanda, Ázerbaıjannyń 2024 jyly klımattyń ózgerýi jónindegi BUU-nyń negizdemelik konvensııasyna qosylýshy taraptardyń 29-shy konferensııasy ótetin memleket retinde tańdalýymen quttyqtady. Jedelhatty Aqordanyń baspasóz qyzmeti jarııalady, dep habarlaıdy Egemen.kz.
«Bul sheshim – Sizdiń elińizdiń halyqaralyq arenadaǵy bedeli joǵary ekeniniń aıqyn dáleli. Sondaı-aq Ázerbaıjannyń tıimdi jáne progressıvti saıasaty men klımatqa qatysty jahandyq kún tártibindegi asqaq murattarǵa beıildigin moıyndaǵanyn bildiredi. Osynaý aýqymdy forýmdy kórikti Baký shaharynda ótkizý Ornyqty damý maqsattaryn ilgeriletýge eleýli úles qosyp, zamanymyzdyń eń ózekti mindetteriniń sheshimin tabýǵa septigin tıgizetinine, sonymen qatar aımaqtyq sıpattaǵy ekologııalyq máselelerge álemdik qoǵamdastyqtyń nazaryn aýdaratynyna senimdimin», dep jazylǵan jedelhatta.
Prezıdent ázerbaıjandyq áriptesine COP29 konferensııasyn tabysty ári nátıjeli ótkizý úshin Qazaqstannyń jan-jaqty kómek berýge daıyn ekenin jetkizip, sharaǵa belsendi qatysatynyn aıtty.