Májiliste Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan bastaǵan depýtattar Ulybrıtanııa Parlamenti Qaýymdar palatasynyń depýtaty Afzal Han jáne Manchester qalalyq keńesiniń múshesi Abıd Chohanmen kezdesip, ekijaqty yntymaqtastyqty keńeıtý máselelerin talqylady, dep habarlaıdy Egemen.kz tómengi Palatanyń baspasóz qyzmetine silteme jasap.
«Aıgúl Quspan Májiliste Qaýymdar palatasynyń Syrtqy ister komıteti jarııalaǵan Ortalyq Azııa týraly baıandamamen muqııat tanysqanyn aıtty. Depýtattar brıtandyq áriptesteriniń Ortalyq Azııa óńirimen saýda, qorshaǵan orta, mádenıet, týrızm jáne ózge de máseleler boıynsha ózara baılanysty nyǵaıtýǵa baǵyttalǵan bastamasyn quptaıdy. О́z kezeginde depýtat Afzal Han Brıtan-Qazaqstan yntymaqtastyǵynyń qorshaǵan ortany qorǵaý, joǵary bilim, mýnısıpaldy damý salalaryndaǵy perspektıvalaryna toqtaldy», delingen aqparatta.
Manchester qalalyq keńesiniń múshesi Abıd Chohan jergilikti ókildi organdardaǵy jumys tájirıbesimen bólisip, Manchester qalasynda elimizdiń Bas konsýldyǵyn ashýǵa shaqyrdy.