Aqyn, halyqaralyq, respýblıkalyq aqyndar aıtysynyń jeńimpazy, respýblıkalyq «Jiger» festıvaliniń laýreaty «qazaqtyń sary tentegi» atanǵan Qýanysh Maqsutovtyń jýyrda jaryq kórgen «Qut» kitabynyń tusaýkeseri ótti.
Astanadaǵy Ulttyq akademııalyq kitaphanada ótken rýhanı is-sharaǵa aqyn-jazýshylar, zııaly qaýym, BAQ ókilderi, joǵary oqý oryndarynyń stýdentteri qatysty.
Aqynnyń óleńderi, bardtyq, shansondyq baǵytta jazǵan ánderi, oı-tolǵamdary, kósemsóz jazbalary toptastyrylǵan kitaptyń tusaýkeser rásiminen keıin Memlekettik syılyqtyń laýreattary jazýshy Álibek Asqarov, aqyn Ǵalym Jaılybaı, jazýshy, Qazaqstannyń eńbek sińirgen qaıratkeri Nesip Júnisbaıuly, fılologııa ǵylymdarynyń doktory Aıgúl Ismaqova bastaǵan zııaly qaýym ókilderi sóz alyp, aqynǵa tileýlestik bildirdi.
«Bıyl 60 jasqa toldym. Osy mereıtoıymda halqyma perzenttik paryzym retinde esep bergim keldi. Jazba poezııamdaǵy óleńderimdi suryptap, bardtyq, shansondyq baǵytta jazǵan ánderimdi jınaqtap, memlekettik, ulttyq qundylyq, eldik murat-múdde týrasyndaǵy paıym-pikir, oı-tolǵam, kósemsózderimdi tııanaqtap kitapqa toptastyrdym. Ekinshiden elimizdiń kitap ındýstrııasyna jańasha lep ákelgim keldi. Bıyl izimizdi basyp kele jatqan talantty jastar AQSh-tyń, Eýropanyń aýqymdy mýzykalyq platformalaryna meniń bardtyq, shansondyq baǵyttaǵy týyndylarymdy engizdi. Biz sol shyǵarmanyń QR-kodyn osy kitapqa da jarııaladyq. Kez kelgen adam qolyndaǵy smartfonyna osy kodty belgileý arqyly meniń YouTube arnama ótip, ulttyq adamzattyq qundylyqtarmen tanysa alady. Kitaptyń sapalyq synyna da basa nazar aýdaryp, muqabasy qaptalǵan bylǵaryny shetelden aldyrdyq. Túrli-tústi etip, árbir týyndyǵa sýret qabystyra otyryp qymbat qaǵazben basýdaǵy muratymyz – kitaptyń mazmundyq salmaǵyn ǵana emes estetıkalyq, kórkemdik qundylyǵyn da arttyrý. Toptastyrylǵan týyndylardyń negizgi bóligi poezııa bolǵandyqtan da estetıkalyq talǵamyna erekshe baıyppen qaradyq. Kitaptyń jaryqqa shyǵýyna qoldaý kórsetken Mádenıet jáne aqparat mınıstrligine, Qaraǵandy oblysynyń ákimdigine, «Amanat», «Aq jol» partııalaryna alǵysymdy aıtamyn. Bul kitap – meniń 10 jyldyq eńbegimniń óteýi. Erterekte Máskeýge arnaıy baryp qazaqtyń bardtyq, shansondyq janryndaǵy týyndylaryn taspaǵa basyp ákelgennen bergi ýaqytta tabanymdy tas tile júrip atqarǵan jumysym osy «Qut» kitabyndaǵy shyǵarmalarym.
Kitapty «Qut» dep ataýymnyń sebebi qazaq rýhanııatyna jańa lep bop enip, qut bop darysa degen ustanym. Eldiń quty qashpaýy úshin bizge eń birinshi ultty uıyta, uıystyra bilý kerek. Al ultty uıytý jolynda qazaqtyń qalamgerleri amanatty arqalaýy tıis. Bul – mindet, al qazaqtyń zııaly qoǵamy áli kúnge bul amanatty paryz deńgeıinde ǵana túsinip júr. Qazir biz memleketti nyǵaıtatyn dúnıege basym kózqaraspen qaraýymyz kerek», dedi Qýanysh Maqsutov.
Aqynnyń buǵan deıin 2013 jyly «Máńgilik muńnyń áýeni» atty bardtyq ánder jınaǵy men «Tákappar muńnyń kerbez tamshylary» atty jyr kitaby jaryq kórdi.