Bul atalǵan áýejaı úshin rekordtyq kórsetkish. Búgin Astana halyqaralyq áýejaıy 7 jarym mıllıonynshy jolaýshyǵa qyzmet kórsetti, ol KC853 reısimen Almaty-Astana baǵytymen ushyp kelgen Seıitqazıevter otbasy boldy, dep habarlaıdy Egemen.kz.
«Reısten bizdi áýejaı basshylyǵy kútip aldy. Erekshe qonaq bolamyz dep múlde oılamappyz. Bunyń bári balamnyń násibi shyǵar. Myń rahmet!», dedi B.Seıitqazıev.
«Astana halyqaralyq áýejaıynan 2023 jyly Ázerbaıjan áýekompanııalary, RedSea, AirCairo, MaviGok áýekompanııalary turaqty reıster oryndaı bastady. Byltyr 6 mıllıon jolaýshy qabyldasaq, bıyl kórsetkish 25 paıyzǵa artyp, elorda áýejaıy 7 jarym mıllıonynshy jolaýshyǵa qyzmet kórsetip jatyr», dedi áýejaıdyń basqarma tóraǵasy Erǵazy Joldasov.
Atalǵan áýejaıdyń baspasóz qyzmetiniń málimetinshe, qarasha aıynda Astana halyqaralyq áýejaıy Terminals Holding kompanııasymen birlesken jumysty bastaǵan. Investor ushý-qoný jolaǵyn kúrdeli jóndeýden ótkizýdi jáne jolaýshylarǵa qyzmet kórsetý sapasyn arttyrýdy josparlap otyr. Nátıjesi boıynsha jolaýshylar aǵynyn 14 mıllıonǵa jetkizý kózdelgen.
Astana áýejaıynan táýligine orta eseppen 200-den asa reıs oryndalady. 11 aıdyń kórsetkishi boıynsha jyl basynan beri 30 myń reıs oryndalǵan.