Oblystyq máslıhattyń VIII kezekten tys sessııasynda oblystyq mádenıet, tilderdi damytý jáne arhıv isi basqarmasy basshysy Medet Taýasqan birlesken qaýly men sheshim jobasymen tanystyrdy, dep habarlaıdy Egemen.kz @Pavlodarnews.kz saıtyna silteme jasap.
«Bul birlesken qaýly men sheshim jobasy Qazaqstan Respýblıkasynyń 1993 jylǵy 8 jeltoqsandaǵy «Qazaqstan Respýblıkasynyń ákimshilik-aýmaqtyq qurylysy týraly» zańyna sáıkes engizildi. Eldi mekenderdi qaıta ataý máselesi bıyl 23 qarashada oblystyq onomastıka komıssııasynyń otyrysynda qaralyp, oń qorytyndyǵa ıe boldy», dedi Medet Taýasqan.
Atalǵan aktige sáıkes Pavlodar qalasynyń Lenın kenti – Atameken kenti, Jelezın aýdanynyń Ozernoe aýyldyq okrýgi men aýyly – Maıly, Tereńkól aýdanynyń Bobrovka aýyldyq okrýgi – Jańa bet, Fedorovka aýyldyq okrýgi men aýyly – Tomarly, Vernenka aýyldyq okrýgi – Altaı aýyldyq okrýgi, Lvovka aýyly – Altaı aýyly, Voskresenka aýyldyq okrýgi men aýyly – Áýlıeaǵash, Berezovka aýyly Aqqaıyń aýyly jáne Trofımovka aýyly Qorjynkól aýyly bolyp qaıta atalady.
Oblystyq máslıhat eldi mekenderdiń atalǵan ataýlaryn biraýyzdan qoldady.