Memleket basshysy Qasym-Jomart Toqaev «Egemen Qazaqstan» gazetine bergen suhbatynda 2029 jylǵa qaraı ulttyq ekonomıkanyń kólemin eki ese arttyryp, 450 mıllıard dollarǵa jetkizý kózdelgeni týraly aıtty, dep habarlaıdy Egemen.kz.
«Árıne, bul – jetýge bolatyn meje. Halyqaralyq valıýta qorynyń sarapshylary 2023 jyldyń qorytyndysy boıynsha Qazaqstannyń Ishki jalpy ónimi qazirgi baǵamen eseptegende 259 mıllıard dollardan asady, ıaǵnı 2022 jylmen salystyrǵanda 15 paıyzǵa artady dep baǵalap otyr. Bul – Ortalyq Azııadaǵy eń joǵary aqshalaı ósim. Jan basyna shaqqandaǵy ishki jalpy ónim de ósip keledi. Buǵan qatysty boljamdy kórsetkish byltyr 13 myń dollarǵa jýyqtady.
Onyń jyl saıynǵy ósimi 1,6 myń dollar bolady dep baǵalanyp otyr. Halyqaralyq valıýta qorynyń boljamyna sáıkes, 2028 jylǵa qaraı bul kórsetkish otyz paıyzdan da kóbirek artyp, 16,8 myń dollarǵa jetedi. Shyn máninde, men úshin makroekonomıkalyq kórsetkishter sonshalyqty mańyzdy emes, azamattardyń turmys sapasynyń is júzinde jaqsarýy odan áldeqaıda mańyzdyraq», dedi Memleket basshysy.
Prezıdent Úkimet ekonomıkany basqarýdyń tyń tásilderin qoldana alsa, jańa aıtylǵan jaqsy boljamdar aqıqatqa aınalatynyn aıtty.
«Birinshiden, elimizdiń órkendeýine jol ashatyn birqatar naqty mindetti sheshý qajet. Sondaı mindettiń biri – aýqymdy ónerkásip jobalaryn júzege asyrý. Qyrkúıektegi Joldaýda Úkimetke mundaı jobalardy anyqtaý jáne Infraqurylymdy damytý josparyn ázirleý týraly tapsyrma berildi. Bul jobalar iri bıznes ókilderimen, ınstıtýsıonaldy ınvestorlarmen jáne sarapshylarmen birge pysyqtalyp, naqty jumys atqarylyp jatyr.
Taǵy bir mańyzdy mindet – ınvestısııa tartý. Bul mindetti oryndaýǵa jekeshelendirý jáne aktıvterdi qaıtarý naýqandary da septigin tıgizedi. Qomaqty ınvestısııa bolsa, ekonomıka qarqyny údeıe túsedi jáne jańa múmkindikter paıda bolady. Osy oraıda men jaqynda Investısııa shtabyn qurý týraly Jarlyqqa qol qoıdym. Bul shtabqa elimizdegi ınvestısııalyq ahýaldy jaqsartý jáne ınvestısııalyq jobalardy sapaly júzege asyrý úshin aýqymdy ókilettik berilgen.
Ekinshi baǵyttaǵy jumys ekonomıkanyń barlyq salasyna qatysty «oıyn tártibin» belgileıtin júıeli reformalardy júzege asyrý sharalaryn qamtıdy. Meniń tapsyrmammen Úkimet memleket pen bıznestiń qarym-qatynasyn qaıta qaraýǵa múmkindik beretin jańa Salyq kodeksin ázirlep jatyr. Salyq júıesin jetildirgende tek tólem jınaý tásilimen shektelip qalmaý óte mańyzdy. Bir jaǵynan, ınvestorlarǵa qolaıly jaǵdaı jasaý kerek. Ekinshi jaǵynan, bıýdjet kirisiniń azaıyp ketpeýine mán bergen jón. Iаǵnı tarazy basyn teń ustaý qajet.
Jańa Bıýdjet kodeksi de – óte mańyzdy qujattyń biri. Biz «qazyna qarajatyna» degen kózqarasymyzdy ózgertip, ony tıimdi, jónimen ári únemdep jumsaýǵa tıispiz. Bul rette memlekettik satyp alý isin jáne memleket pen jeke sektordyń seriktestigin retteıtin jańa zańdar eleýli ról atqarady. Osy qujattar memlekettik satyp alý isiniń ashyq bolýyn da qamtamasyz etedi. Sondaı-aq ekonomıkany damytýǵa qajetti qarajat qoryn qalyptastyrýǵa septigin tıgizedi», dedi Prezıdent.
Budan soń ol kvazımemlekettik sektordyń tıimdiligin arttyrýǵa kóp kóńil bólý qajet ekenin aıtty.
«Myna máselege nazar aýdarǵym keledi. Álemdegi ekonomıkalyq ahýal bizdiń elge de salqynyn tıgizetini sózsiz. Alaıda kez kelgen qıyndyq jańa múmkindikke jol ashady. Úkimettiń jel qaıdan soqsa da jelkendi ózine ońtaıly bura alatyndaı, jan-jaqty oılastyrǵan jospary bolýǵa tıis. Ekonomıkanyń ósimin yntalandyrý sharalary men qurylymdyq reformalar qatar júrýi kerek. Naqtyraq aıtsaq, kásipkerlik pen básekeni damytý, jekemenshikti qorǵaý, ádil sot tóreligi bolýy óte mańyzdy. Sonda ǵana kózdegen maqsattarymyzdyń bárine qol jetkizip, belgilengen merzimde ulttyq ekonomıka kólemin eki ese ulǵaıta alamyz», dedi Prezıdent.